Inatsisartut: Illuatungiliuttut angusaqarluarput
Ilanngaatit pillugit Inatsisartuni oqallinnermi siunnersuutit ataatsimiititalianut ingerlateqqinneqarput
Akileraarnermut ilanngaatit 2005-imili allanngortinneqarsimanngitsut Inatsisartuni oqaluuserineqarput ullumi sisamanngornermi.
Naatsorsuutigineqarsimagaluarpoq oqallinneq sivisuallaassanngitsoq, taamaattoqanngilarli. Sivisuumik oqallittoqareersoq oqallisigineqartut Inatsisartunit ataatsimiititalianut ingerlatinneqaqqipput. Aappassaanik oqallisigineqassapput ataasinngorpat.
Sulinermut ilanngaat
Oqallisigineqartup ataatsimiititaliamut ingerlateqqinneqarnissaa aningaasaqarnermut naalakkersuisuusimasumit Aqqaluaq B. Egedemit innersuunneqarpoq. Naalakkersuisut akileraarnermut siunnertaat nalornissutigineqarmat taamatut siunnersuuteqarpoq.
- Sulinermut ilanngaat 2019-mi atuutilernissaa Naalakkersuisooqatigiinnit anguniarneqarpoq, Aqqaluaq B. Egede oqaluttarfimmit oqarpoq. Naalakkersuisooqatigiilersut akileraartarnermut aaqqissuusseqqissanersut aamma paaserusuppaa.
Demokraatit siulittaasuat Randi V. Evaldsenip oqallisigineqartoq ataatsimiititaliami aamma oqallisigineqarnissaa inassutigaa. Sulinermut ilanngaat qanoq aningaasalerneqassanersoq ilaatigut paaserusuppaa.
Partii Naleqqamit Jens Napaattooq arlaleriarluni oqaluttarfimmut qaqivoq, naggataatigullu siunnersuut isumaqatigalugu ataatsimiititaliami oqaluuserineqassasoq.
Pele Broberg naalakkersuisutut siullermeerluni oqaluuserineqartoq suliaraa. Oqaluuserineqartoq toqqaannartumik oqaaseqarfiginngilaa, 2019-mulli sulinermut ilanngaat aningaasaqarnermut inatsimmut ilaasinnaasoq oqaatigalugu.
Aallarteqqammertut
- Apeqqutigineqartorpassuit akissuteqarfigissagukkit akissutit eqqoriaanerussapput. Oqaluuserineqartoq pulaffiginerusariaqarparput, Naalakkersuisooqatigiittummi aallarteqqammerpugut, Pele Broberg oqarpoq. Demokraatinut ilaatigut oqaatigaa topskatip atuutilernissaa eqqarsaatigineqanngitsoq.