Pingasunngornermi Inatsisartut ataatsimiititalianut ilaasortaaffissaminnut inississorput. Naalakkersuisuni nikittoqangaatsiarnera ataatsimiititaliat katitigaanerannut allanngortitsivoq.

Naalakkersuisooqatigiit Inatsisartuni ilaasortaatitai siulittaasuuffiit tamaasa inuttalersorpaat illuatungiliuttullu partiivisa siulittaasup tulliata issiavii tamaasa inuttalersorlugit.

Aningaasaqarnermut akileraartarnermullu ataatsimiititaliami siulittaasunngorpoq Asii Chemnitz Narup (IA). Taanna siusinnerusukkut aningaasaqarnermut naalakkersuisuusimavoq aammalu Kommuneqarfik Sermersuumi borgmesteriunermini kommunalbestyrelsip aningaasaqarnermut ataatsimiititaliaani siulittaasuunikuulluni.

IA´p qinigaalluartitaasa ilaat Narsameersoq, Marianne Paviassen, nunanut allanut sillimaniarnermullu ataatsimiititaliami siulittaasunngorpoq. Taanna piffissami sivisunngitsumi qinikkatut sulisimagaluarluni Inatsisartuni misilittagaqarlualereerpoq, qinigaaffiup siuliani sinniisussatut Inatsisartuniippoq maannalu nammineq qinerneqarluarnermigut Inatsisartuni ilaasortaviulluni. Piffissap sivikitsup taassuma iluani aamma ilaatigut Nunanut allanut naalakkersuisutut misilittagaqarpoq.

Ilisimaneqartutut Hans Aronsen IA-meersoq tamakkiisumik Inatsisartuni ilaasortanngornikuuvoq, taannali napparsimalluni sulinngiffeqarmat peqqisseqqinnissaata tungaanut Mariia Simonsen 10. novemberip tungaanut Inatsisartunut aggersagaanikuuvoq suliaanillu paarsilluni. 

Kristian Jeremiassen (IA) aalisarnermut, piniarnermut nunalerinermullu ataatsimiititaliami siulittaasunngorpoq, ataatsimiititaliamilu tassani aalisarnermut piniarnermullu naalakkersuisutut tunuaqqammertoq, Karl Tobiassen (S) ataatsimiititaliami ilaasortatut inissippoq.

27. septemberimi ataatsimiititaliani inississornerit tamaaasa UANI qimerloorsinnaavatit.