Inatsisartut upernaanerani ataatsimiissapput
Siulittaasoqarfimmi ilaasortat tallimat aalajangerpaat Inatsisartut upernaanerani ataatsimiissasut. Naalakkersuisunut siulittaasoq Kim Kielsen ataatsimiinnissap taamaatiinnarneqarnissaa oqariartuutigereerpaa
Inatsisartut upernaanerani piaarnerpaamik ataatsimiissasut Inatsisartunut siulittaasup Vivian Motzfeldtip Sermitsiaq.AG-mut oqaatigaa. Inatsisartut siulittaasoqarfiata ataatsimeereernerani taamatut aalajangertoqartoq oqarpoq.
- Ataatsimiinnissaq nalinginnaasumit allaanerussaaq, ingerlatsinermut malittarisassanut atatillugu maleruagassat malinneqarnissaat anguniarlugu ataatsimiittoqassalluni, Vivian Motzfeldt oqarpoq.
Inatsisartut ataatsimiinnissaat taamaatiinnarneqassanersoq ingerlanneqassanersorluunniit taamaasilluni nalornissutaajunnaarpoq. Coronavirusimik ajornartoortoqarnera pissutigalugu Kim Kielsenip ataatsimiinnerup ingerlanneqannginnissaa siunnersuutigereerpaa.
Kim Kielsenip innersuussaa taperserlugu Demokraatit siulittaasuat Nivi Olsen Sermitsiaq.AG-mut uppernarsaareerpoq. Siulittaasoqarfimmi Demokraatit aamma Siumut katillugit pingasunik ilaasortaatitaqarput, ataatsimiinerup taamaatiinnarnissaanik amerlanerussuteqarsinnaagaluarlutik.
Inatsisartut ukiaanerani ataatsimiilerpata aatsaat ataatsimiittoqaqqissasoq Kim Kielsenimit siunnersuutigineqareerpoq. Illuatungiliuttut isumaqarput Inatsisartut piaarnerpaamik ataatsimiittariaqartut, tamannalu piviusunngortinneqarpoq.
Ataatsimiinnermi nutaanik siunnersuuteqartoqassanngitsoq siulittaasoqarfiup siulittaasuata tulliata Mimi Karlsenip (IA) oqaatigaa. Ukiaanerani kingullermik ataatsimiinnermi siullermeerluni oqallisigineqartut upernaanerani ataatsimiinnermi aappassaaneerlugillu pingajussaanik oqallisigineqassasut oqaatigaa.
Ataatsimiititaliani inissat kiisalu FN-imut aallartitarineqartussat ilaatigut ataatsimiinnermi toqqarneqassapput.
Inatsisartut upernaanerani ataatsimiinnerat qaqagu aallartissanersoq suli ilisimaneqanngilaq. Apriilip 17-ani ataatsimiittoqartussaagaluarnera qaammammik ataatsimik kinguartinneqarnikuuvoq. Taamatut aalajangerneq allanngortinneqaqqinnikuunngilaq. Taamaasilluni Inatsisartut ataatsimiinnissaat maanna piareersarneqaleruttorpoq.