Inatsisartut ukiakkut ataatsimiinnerat aallartippoq
Inatsisartut ukiakkut ataatsimiinnerat ullumi tallimanngornermi septemberip 20-ani aallartippoq. Pisarneq malillugu naalagiaqatigiittoqarpoq Inatsisartullu ataatsimiittarfiata tungaanut pisoqatigiittoqarluni.
Inatsisartut ataatsimiiffissaanni siullermi ullaaq qiianarluni anorsaarpoq. Ukiassariartulernerani ullaat qiianarnerusut siulliit ilaanni ukiakkut ataatsimiinneq ammarneqarpoq. Anoraannguup nillerluinnartup Inatsisartuni ilaasortat isiginnaartullu allat paasitippai aasaq naalersoq, sulileqqiffissanngortorlu.
Annaassisitta Oqaluffiata tungaanut ingerlaaqatigiittut ileqqoq malillugu Naalakkersuisut siulittaasuannit Kim Kielsenimit Inatsisartullu siulittaasuannit Vivian Motzfeldtimit siulersorneqarput. Inatsisartut nunamut tunngassuteqartunik politikkikkut suliat aallarteqqinnginnerini naalagiaqqaassapput.
Aaqqiagiinngissimanerit arlaannaatigulluunniit malunnaateqanngillat, ingerlaaqatigiit eqqissillutik oqaluffimmut ingerlaarput.
Tullit asassavat
Domprovsti John Johansen Inatsisartuni Naalakkersuisunilu ilaasortat tulliup asaneqarnissaa pillugu oqaluussivoq. Domprovstip erseqqissarpaa tulliup asanera eqqaamallugu Inatsisartut sulisariaqartut. Taassuma erseqqissarpaa Inatsisartut Naalakkersuisullu innuttaasut sullinnissaat eqqaamassagaat.
Pitsaasumik oqalunneq
Inatsisartuni siulittaasutut qinerneqaqqittup Vivian Motzfeldtip pingaartippaa Inatsisartuni ilaasortat pitsaasumik oqallittariaaseqarnissaat. Aammali erseqqissaatigaa ataatsimut isigalugu partiit tamarmik amerlanertigut assigiikannersumik anguniagaqartarnerat.
- Soorunami uannut siulittaasutut pingaaruteqarpoq inatsisartuni ilaasortaasugut tamatta akisussaaffeqartugut oqallinnerup pitsaasumik ingerlanneqarnissaannut. Naatsorsuutigaara suliat torersumik sukumiisumillu inersuarmi suliarineqassasut. Aammali eqqaamaneqassaaq isumaqatigiinngikkaluaraanniluunniit pitsaasumik nipeqarluni oqallittoqarsinnaasoq, erseqqissaavoq.
Amerikamiut malinnaapput
Inatsisartut sulinerat USA-miit malinnaavigineqarluarpasippoq. USA-p Nuummi diplomatia Sung Choi, nunatta amerikallu ataqatigiinnerulernissaannut suliaqartussaq, Inatsisartut Naalakkersuisullu naalagiaqataaneranni inersuarmilu siulittaasup oqalugiarnerani peqataavoq.
Domprovstip oqalugiummini erseqqissaatigaa peqquserlunnissaq inunnut pilerinarsinnaasartoq sulinermilu ajornannginnerpaasinnaasartoq, taannali aqqutissaassanngitsoq.
- Naalakkersuisuni aamma Inatsisartuni ilaasortat, eqqaamasiuk inuiaqatigiit sullikkassigit, sulinissinni tulliup asanissaa pillugu suliaqarisi, John Johansen oqaluussinermini oqarpoq.
Siulittaasup oqalugiutaa
Naalakkersuisut siulittaasuata inersuarmi oqalugiumminittaaq tulliup asanissaa pillugu oqaaseqarpoq. Naalagiarnerup nalaani tussiarsimasartik issuaavigaa.
Inatsisartut ukiaanerani ataatsimiinnerminni suliassarpassuaqarput, Naalakkersuisut 24-nik inatsisissatut siunnersuuteqarput, arfinilinnik aalajangiiffigisassatut siunnersuuteqarlutik kiisalu nassuiaatinik arfineq-marlunnik saqqummiussissallutik.
Utoqqalinersiutit pitsanngorsaavigineqassapput. Avataaniit suliartortitsinissamut periarfissat pitanngorsarneqassapput. Aalisarnermut inatsit nutaanngortinneqarnissaanut suliaq naammassineqassaaq. Meeqqat atugaat sammineqassapput ilaqutariinnullu politikki saqqummiunneqarnissaminut piareersimalluni. Allarpassuillu.
- Inuiaqatigiinni inuunerput pitsanngorsartuassallugu tamatta sulissaagut. Tunumiuugutta, kitaamiuugutta, avannaamiuugutta imaluunniit kujataamiuugutta: Nuna tummagarput ataasiinnaavoq. Uagut nunarput Kalaallit Nunaat, immitsinnut akimmisaartigata assigiinngiiaassuseq nukigalugu peqatigiilluta siuarsarniartigu, Naalakkersuisut siulittaasuata Kim Kielsenip oqalugiutini naggaserlugu oqarpoq.
Siulittaasup oqalugiutaa Inatsisartuni ataasinngorpat septemberip 23-ani oqallisigineqassaaq.