Inatsisartut Tunumi mittarfissanik misissuinissamut aningaasanik immikkoortitsipput
Naalakkersuisut innersuussuteqarnerisigut Aningaasaqarnermut Akileraartarnermullu Ataatsimiititaliap aalajangerpaa, Tasiilami Ittoqqortoormiinilu mittarfiliassanut isumassarsiatut siunnersuusiortitsinissamut aningaasanik immikkoortitsisoqassasoq.
Maanna qulimiguulinnut mittarfinnut taarsiullugu, Tunumi nutaanik asfaltilersukkanik mittarfittaarnissamut anguniakkamut qanilliallattoqarpoq. Misissuisoqaqqinnissaanut qaninnerulerpoq.
Nassuiaammi 2019-imi misissuinernit suliarineqarsimasumi, Tasiilami Ittoqqortoormiinilu mittarfinnik 799 meterisut takissusilinnik sanaartortoqassappat, katillugu 623 millionit koruuninik akeqassaaq, kisianni taanna akigititaq allanngorsimasinnaavoq, sanaartornermut atortut akitsoriartupiloornerat aamma aningaasat nalikilliartornerat allanngortitsisinnaammata.
Tasiilaq Ittoqqortoormiillu asfaltimik mittarfittaarnissaat nassuiaammi innersuunneqarpoq, angallannermut aningaasartuutinik appartitsinissamik siunertamut naammassinnimmata, aamma timmisartuussisarnerup akulikillinissaa siunertaralugit, pilersaarusioqqullugit Inatsisartut peqqusereernerisa kingorna. Politikerillu maanna amerlanerusunik misissuinissamut piareersimapput.
Inatsisartut 2020-mi ukiakkut ataatsimiinneranni misissueqqissaarnerit saqqummiunneqarput, tassani Sanaartornermut Ataatsimiititaliami amerlanerussuteqartut inassutigaat, Tasiilami Ittoqqortoormiinilu mittarfiit suliarineqarnissaasa aallartisarneqarnissaat.
Inassuteqaat taanna tunuliaqutigalugu, mittarfiit taakku marluk pilersaarusiorneqarnerisa aallartinneqarnissaat Naalakkersuisut aalajangiuppaat.
Sumi aamma qanoq misissorneqassapput
Tamatuma kingunerisaanik mittarfiliassat sumi sanaartorneqarsinnaassanersut kiisalu mittarfiit takissusissaat silissusissaallu, sumut sammissanersut, nunallu ilusaanut naleqqussarneqarnissaat ilaatigut isummerfigineqassaaq. Tamatuma saniatigut silasiornermi paasissutissat pigineqartut misissoqqissaarneqassapput.
- Tunumi mittarfissat taakkua marluk pilersaarusiorneqarnissaat maanna aallartisarsinnaaleratsigu nuannaarutigaara. Mittarfissat qanoq pitsaanerpaamik ilusilersorneqarsinnaanissaannik kiisalu piffissaq eqqorlugu tikittarnissanut/aallartarnissanut, isumannaallisaanermut, politikkikkullu kissaatinut tulleriiaarneqarsimasunut allanut Tasiilami Ittoqqortoormiinilu mittarfissat naatsorsuutitsinnik naammassinnissinnaassanersut annerusumik ilisimasaqarnerulersissavaatigut, Ineqarnermut Attaveqaasersuutinullu Naalakkersuisoq taama Erik Jensen oqaaseqarpoq.
Isumassarsiatut siunnersuutit naammassineqareerpata mittarfissat sulissutigalugit ingerlateqqinneqassasut aalajangiunneqassappat, qanoq akeqarnissaanik missiliuut ilanngullugu pilersaarutivissaq kingusinnerusukkut suliarineqassaaq.
Isumassarsiatut siunnersuusiat pilersaarusiornerlu naammassineqariarpata, mittarfiliassat piviusunngortinneqarnissaanni mittarfiliornissanut aningaasaliissutissat nassaariniarneqarnissaat tullinnguutissaaq.