siunnersuisoqatigiit
Inatsisartut siulittaasuisa pingasut akornanni ataatsimiinneq
Inatsisartut siulittaasuat Lars-Emil Johansen sapaatip-akunnerata ingerlanerani nunat avannarliit killiini inatsisartuini siulittaasuinik ataatsimeeqateqarpoq.
Ulluni 12.-14. juni nunani avannarlerni killerni inatsisartut siulittaasuisa ukiumoortumik ataatsimiinneranni Nuummi ingerlanneqartumi Inatsisartut Siulittaasuata siulittaasooqatini Altingip siulittaasua Unnur Brá Konráðsdóttir Lagtingillu siulittaasua Páll á Reynatúgvu naapeqatigai, tusagassiuutinut nalunaarummi ilisimatitsissutigineqarpoq.
Suleqatigiinnermut tunngasut
Ataatsimiinnermi nunat pingasut akornanni apeqqutit ataatsimut suleqatigiinnermut tunngasut oqallisigineqarput. Nunat Avannarliit Killiit Siunnersuisoqatigiiffiat maajip qaammataani Issittumi Siunnersuisoqatigiinni alaatsinaatsutut inissisimalerpoq ukiunilu kingullerni Arctic Circlep aaqqissuussisarnerisigut inatsisartunut ilaasortat Issittoq pillugu nunat tamalaat akornanni oqaloqatigiinneq pingaartillugu nutaamik allaasumillu suleqatigiiffeqalersimallutik.
Siulittaasut Nuummiinnerminni taamatuttaaq Kangerluarsorutsimut Nordafarimullu alakkaapput.
Nunani pingasuni inatsisartut siulittaasuisa akornanni suleqatigiinneq pillugu Inatsisartut siulittaasuat ima oqarpoq:
- Nunani ataasiakkaani naalakkersuinikkut sulineq pillugu paasissutisseeqatigiillutik siulittaasut ukiumoortumik ataatsimiittarnerat inatsisartutigoortumik suleqatigiinnermut pisuunngorsaataavoq, nunat pingasut akornanni inatsisartutigut suleqatigiinnermut tamatumalu qanoq iluseqarnissaanut siulittaasut pingasut isumassiorfigisinnaasaat, Lars-Emil Johansen oqarpoq, Nunat Avannarliit Killiit Siunnersuisoqatigiiffiat nutaaliornertut siunissami nunat pingasut inatsisartuisa ataatsimiittarfiini ukiumoortumik ataatsimiittalissanerarpaa.
Aggustimi Altingimi
Ukiumoortumik ataatsimiinneq siulleq ulluni 31. august – 1. september Reykjavikimi Altingimi ingerlanneqassalluni. Ukiumoortumik ataatsimiinneq 2018-imi Lagtingimi 2019-imilu Inatsisartut ataatsimiittarfianni ingerlanneqassapput, tusagassiuutinut nalunaarummi tamanna atuarneqarsinnaavoq.