Inatsisartut Siulittaasuat: Inatsisartut suleriaasiat erseqqissuuvoq
Naalakkersuisut Kukkunersiuinermut Ataatsimiititaliamut pappialanik tunniussisussaanersut oqaluuserineqatariaqanngilaq. Tassunga tunngatillugu Inatsisartut suleriaasiat erseqqissuuvoq, Inatsisartut Siulittaasuat Vivian Motzfeldt oqarpoq.
Kukkunersiuinermut Ataatsimiititaliap nipisatttasiissutit pillugit suliaq qaammatini pingasuni suliarisimavaa. Ataatsimiititaliap piffissamik atuisimanerminut tunngavilersuutigaa, suliamik ingerlatsisimaneq suliamilu piviusut paasiniarlugit pappialanik paasissutissanillu pissarsiniarneq ajornakusoorsimasoq. Inatsiartut Siulittaasuat aamma taamatut misigisimavoq.
- Tamannarpiaavorlu ataatsimiititaliamit isornartorsiorneqarsimasoq, Vivian Motzfeldt Sermitsiaq.AG-mut oqarpoq.
- Suliamik ingerlatsineq pisariaqanngitsumik sivisuallaarsimavoq, paasissutissanik Naalakkersuisunit pissarsiniarnerup ajornarsimanera pissutigalugu, taanna oqarpoq.
Malittarisassat erseqqissut
Siulittaasup ilisimatitsissutigaa, Siulittaasoqarfimmit tamanna eqqumaffigineqarsimasoq, aamma suliat pillugit Naalakkersuisunut saaffiginnittarsimallutik.
Kukkunersiuinermut Ataatsimiititaliaq Aalisarnermullu Ataatsimiititaliaq paaissutissanik pisarsiniarnerminni unammilligassaqartarsimapput. Malittarisassat erseqqissuugaluartut, siulittaasoq isumaqarpoq.
- Suleriaasitsinni erseqqissorujussuarmik allassimavoq, ataatsimiititaliat paasissutissanik Naalakkersuisunit pissarsisussaasut.
- Pingaartumik Aningaasaqarnermut Kukkunersiuinermullu Ataatsimiititaliat paasissutissanik pisariaqartitaminnik pissarsisussaapput, taakkuummatami Naalakkersuisunik nakkutilliisussaasut, taanna oqarpoq.
Aaqqiissutissaasinnaasumik takusaqarsinnaanngitsoq
Qanoq ililluni qulakkeerneqarsinnaava, ataatsimiititaliat papialanik uppernarsaataasinnaasunik pisariaqartitaminnik siunissami pissarsisarnissaat?
- Isumaqarpunga tamanna akiuminaatsupilussuusoq, suleriaasitsinnimi allassimareerpoq, ataatismiitialiat paasissutissanik pappialanillu uppernarsaataasussanik pissisarsisartussaasut.
Naalakkersuisut paasissutissanik ataatsimiititalianut tunniussinissamut killiliisimanerat kinguneqartinneqassava?
- Tamanna paasinarsiumaarpoq. Inatsisartut apeqqutaapput. Ataatsimiititaliammi suliaqarnissamut aporfilersorneqartarneri tamarmik oqartussaaqataanermut ajoqusiisarput. Ataqqeqatigiinnissaq matumani pineqarpoq. Inuit ataasiakkaat pineqaratik nuna tamarmi pineqartarpoq. Kim Kielsen matumani pineqanngilaq, siulittaasoq erseqqissaavoq.
Vivian Motzfeldtip nassuiaatigaa, Naalakkersuisut suleriaatsimik malinninngikkaangata Siulittaasoqarfik kinguneqartitsinissamut periarfissaqanngitsoq, Inatsiartulli tassaasut kinguneqartitsisoqassanersoq pillugu isummertussaasut.