Skip to main content

Inatsisartut siulittaasoqarfimmit killilersuiffigineqalersut

Inatsisartut Siulittaasoqarfiata ullaakkorsioqatigiinnissaq taamaatippaat, coronallu tunillaassuunnera pissutigalugu ataatsimiittarfimmi inuit amerlassusissaat killeqartilerlugu. Innuttaasunut katersuunnissamut killilersuuteqanngilaq.

Nuummi innuttaasunut katersuunnissamut killilersuuteqanngikkaluartoq, Inatsisartut Siulittaasoqarfiata inatsisartut ataatsimiittarfianni katersuussinnaaneq killilerpaa.

Illoqarfiit pingaarnersaanni tunillaassuuttoqaraluartoq akiuussusersuineq ingerlalluarmat annertunerusumik killilersuisoqassanngitsoq Naalakkersuisut nalunaaruteqareeraluartut, taamaattoq ataatsimiittarfimmiissinnaasut killeqalersinneqarput.

Inatsisartunut ilaasortanut killilersuutit isumaqarput ataatsimiinnerni ilaasortat amerlanerpaamik 19-it ataatsimiittarfimmiissinnaasassasut. Taamaattumillu taasisoqarnissaanut inatsisartuni ilaasortat akunnerminni isumaqatigiissuteqartariaqartassasut.

Inatsisartut ataatsimiinnerat 23. november naammassissaaq, ullullu ataatsimiiffiusussat 28-iupput.

Akisussaassuseqarneq

Kent Fridberg, Inatsisartoqarfimmiit oqaluttuarpoq ataatsimiittarfimmi killilersuutit qanoq sivisutigisumik atuutissanersut oqaatigisinnaanagu.

- Akisussaassuseqarneq takutikkumallugu Inatsisartut Siulittaasoqarfiata ataatsimiittarfimmiissinnaasut killilerpai, katersuunnissat ingalassimaaqquneqarmata, Kent Fridberg oqarpoq.

- Killilersuineq ullumikkut atuuppoq, pissutsilli malinnaavigineqaqqissaarmata killilersuutit ataatsimiinnerup ulluini tullerni aamma atuuteratarsinnaapput, oqarpoq.

Nunatta nakorsaanera Henrik L. Hansenip illoqarfiit pingaarnersaanni katersuunnernut annertuunut ingalassimanissaq innersuussutiginikuuaa, Nuummi tunillaassuunneq annertummat. Illoqarfiit pingaarnersaanni tunillatsissimasut katillugit sisamanngormat 135-upput.

Naalakkersuisut tusarnaariartullu killilerlugit

Inatsisartut Siulittaasoqarfiata Naalakkersuisunut innersuussutigaa Naalakkersuisoq oqallinnermi susassaqartoq kisimi ataatsimiinnermi peqataasassasoq. Taamaasiornikkut Inatsisartuni ilaasortat amerlanerusut peqataasinnaasassammata. Naalakkersuisut innersuussummik malinninnissaat naatsorsuutigineqarpoq.

Takkullutik tusarnaariartut issiavii alliit atorneqassanngillat, qulaanilu issiaviit affai kisimik atussallutik.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER