Inatsisartut siulittaasoqarfiat tamat oqartussaaqataanerinik nangiarnartorsiortitsisoq KNR isumaqarpoq

Ullumi siunnersuut Inatsisartuni suliarineqartumut Nukaaraq Eugenius ernumassuteqarpoq.

Inatsisartut ataatsimiinneranni radiokkut aallakaatitsisaleqqinnissaanik Inatsisartut siulittaasoqarfiata siunnersuuteqarnerata kingorna, KNR-ip siulersuisuuneranni siulittaasuunini atorlugu, Inatsisartut siulittaasoqarfianut ammasumi allaqarpoq.

- Inatsisartut ataatsimiittarnerisa radiukkut aallakaatittarnissaannik KNR-i pinngitsaalissallugu Inatsisartut siulittasoqarfiata kissaateqarnera akuliusimannginnissamik tunngaveqarnermik, tusagassiisarfimmik nukittuumik kiffaanngissuseqartumillu qulakkiisussamik, unioqqutitsineruvoq, taamaaliornerlu inuiaqatigiit tamat oqartussaaqataaffigisaat peqqissuusoq nutaaliaasorlu piujuaannartinnissaa eqqarsaatigalugu aamma nangiarnartorsiortitsineruvoq ulorianartoq, siulersuunerni siulittaasoq allagaqarnermini taama aallarniivoq.

Ukioq kingulleq Inatsisartut upernaakkut ataatsimiittarnernik allannguinerisa kingunerisaanik, KNR radiokkut aallakaatitsissaarpoq. Ilaatigut radiokkut aallaakaatitassianik nutarterinermik siunertarineqarluni.

- Kikkut tamarmik malinnaasinnaasariaqarput

KNR TV-p kanaaliata aappaani internetsikkulli aallakaatitsinerit ingerlaannarput. Tamannalu naammannginanngilaq, inersuarmimi oqallittoqarnerani inuit sulisarput taakkunanilu malinnasinnaanatik, Inatsisartut siulittaasoqarfiat isumaqarpoq.

- Oqallinnermi innuttaasut malinnaanissaata periarfissinneqarnissaat pingaartitarivara. Taamatulli pissappata inersuarmi oqallinnerni malinnaasinnaasariaqarput. KNR Radio nuna tamakkerlugu toqqaannartumik kisimi aallakaatitassiortuuvoq, inersuarmilu aallakaatitsinissaat pissusimasoortutut isigaara, tamannali siulittaasoqarfimmi tamaginni isumaqataaffigineqarpoq, Inatsisartut siulittaasuat, Lars-Emil Johansen, Sermitsiaq.AG-mut oqarpoq.

- Kiffaanngitsumik tusagassiisarfeqarneq illersorneqarli

KNR-illi aallakaatitassioriaasia politikkerit akuleriffigisariaqanngikkaat, Nukaraq Eugenius isumaqarpoq.

- Kiffaanngitsumik tusagassiisarfeqarnissaq, naalakkersuinikkut aqunneqanngitsoq, tamat oqartussaaqataaffigisaannut peqqissumut nutaaliaasumullu pingaaruteqarluinnartuuvoq. Tusagassiorfiitsunik allaaserisaqassanersut aallakaatitsissanersulluunniit naalakkersuinermik suliaqartut peqqusiniarnerat akuerineqarsinnaanngilaq, inaarutaasumimmi inuiaqatigiinni innuttaasut kiffaanngitsumik tutsuiginartumillu paasissutissinneqartarnissaat naalakkersorniarneqarpoq, taanna ammasumik allagaqarpoq.

Kanalimik pilersitsinissaq periarfissaavoq

Inuttaasut oqallinnerni radiokkut malinnaasinnaajunnaarnerat, tamat oqartussaaqataaneranik innarliinernertut isigalugu, Lars-Emil Johansen quppernermini isummerpoq.

- Paasissutissat tamanit takuneqarsinnaasariaqarput. Inersuarmi politikerit oqaaseqarneri, tusagassiortut pingaarnersiuillutik saqqummiussaat apeqqutaatinnagit innuttaasut malinnaasinnaasariaqarput, taanna oqarpoq.

Radio kanalimik pilersitsisoqarsinnaavoq, KNR2, tassani Inatsisartut ataatsimiinnerat malinnaavigineqarsinnaassalluni, Lars-Emil Johansen tikkuaavoq. Kultureqarnermut Ilinniartitaanermulli ataatsitaliap siunnersuutip qanoq isikkoqarnissaa suliarissavaat, taanna oqarpoq.

Lars-Emil Johansen, Inatsisartut nammineerlutik kanalimik ingerlatsisinnaanerat takorloorneqarsinnaava?

- Taamaasiortoqarsinnaavoq, kisianni KNR-p kanaliisa qanitaanniissaaq, inuit nanisinnaasaannik.

Tusarnaartartut aallavigineqartut

Atuisartut siunnersuisoqatigiivi, ukiumoortumik isiginnaartartut, tusarnaartartut Innuttaasunillu Sulissisussaanermik isumaqatigiissuterput aallaavigalugu, KNR nammineerluni aallakaatitassiortartoq, Nukaraq Eugenius oqarpoq. Innuttaasunik Sulissisussaatitaaneq siorna aasakkut isumaqatigiissutigineqarpoq.

- KNR pillugu avoqqaarinerit, isornartorsiuinerit oqallinnerillu tamatigut ammaffigineqarput aammalu sulinitsinnut pingaaruteqartuullutik. Kisiannili naalakkersuinikkut toqqaannartumik aqutsineq Innuttaasunik Sullissisussaalluni aallakaatitsiviup tutsuiginassusianik aseruisuussaaq, siulersuisuunerni siulittaasoq nangilluni allappoq.

Innuttaasunik Sulissisussaatitaanermut tapiliussatut piumasaaqatigineqarsinnaanera, siulittaasoqarfiup misissorsimasaani inatsisitigut akornutissartaqanngitsoq, Lars-Emil Johansenip oqaatigaa.

- Sakiusip Benjaminnillu malinnaasinnaanerat taamaallaat pingaartippara, taanna oqarpoq.

Atuaruk: Tv-imik atuineq appariangaatsiartoq

Tusarnaartartunik misissuineq

Inersuarmi ataatsimiinnerni aallakaatitsinerit taarseratsigit Sakiusip Benjaminillu nuannaarutigisimagaat, Nukaaraq Eugenius oqarpoq. Tusarnaartartunik isiginnaartartunillu misissuineq saqqummiunneqarsimasumut, taanna tikkuussivoq.

- Taamaattumik aallakaatitsiffissap pitsaanerpaap nalaani tusarnaartartutta aallakaatitassiatsinnik nuannarinninnerat sumiginnarlugu Inatsisartut ataatsimiittarnerinik aallakaatitsisalernissarput uagutsinnut ungasippoq, taanna allappoq.