Skip to main content

Inatsisartut qaqugu qinersissanersut ataatsimiititaliap oqaluuserissavaa

Politikkikkut killiffik pillugu akunnerni pingasuni oqallittoqareersorlu, Inatsisartuni qinersisoqarnissaanut siunnersuut ataatsimiititaliamut suliaripallanneqartussanngorlugu ingerlateqqinneqarpoq.

Inatsisartuni amerlanerussuteqartut qinersisoqarnissaanik kissaateqarput. Inatsisartunulli ulloq suna qinersisoqassanersoq suli oqaluuserineqarpoq.

Inatsisartunut immikkut ittumik qinersinissamut ulluliunneqarsimavoq 6. april. Tassa kommuninut nunaqarfinni aqutsisunut aamma ilagiit sinniisaannut qinersivissap ullua assigalugu.

Inuit Ataqatigiit, Demokraatit, Partii Naleraq aamma Atassut Inatsisartut ukiukkut ataatsimiinneranni ullormi siullermi oqaluuserisassamik qaqitsisuupput.

Partiit tamangajalluinnarmik politikkikkut killiffik nammanneqaannarsinnaanngitsumik oqariartorput.

Ulloq qinersivissaq ataatsimiissutigineqarpoq

Ullorli qinersivissaq apeqquserneqarpoq, soorlu Siumumit, Inuit Ataqatigiinnit aamma Nunatta Qitornaanit.

Siunnersuut inatsisinut ataatsimiititaliamit oqaluuserineqartussanngorlugu innersuunneqarpoq, tassanilu aningaasaqarnermut akileraartarnermullu ataatsimiititaliaq aamma tusarneqassalluni. Ulloq qinersivissaq aamma Naalakkersuisut allannguutissatut siunnersuutaat ataatsimiititaliap aalajangiiffigissavai.

Sapaatit akunneri marluk ingerlaneranni Naalakkersuisoqatigiit partiit pingasuugaluartut marluinnanngorput. Demokraatit naalakkersuisoqataajunnaarput, naalakkersuisoqatigiillu napaannarnissaminnut ajalusoorluinnarlutik.

Inatsisartuni siulittaasoqarfik ilisimatitsivoq ataatsimiititaliami ataatsimiinneq akunnialunni ingerlasinnaasoq, kingornalu immikkoortoq 18 ataatsimiissutigalugu aappassaaneerneqarumaartoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER