Inatsisartut killilersuutinik nakkutiginneqqusisut: Inatsit nutaaq sivikitsuinnarmik atuutissaaq
Nappaammik tuniluuttoqarneranut inatsit nutaaq ukiumi ataasiinnarmi atuutissaaq. Inatsisartut siunissami tuniluuttoqarnerani killilersuutissanik akuersissuteqartarnissamut periarfissaqarusupput, Naalakkersuisulli tamatumunnga ilaleerusunngillat.
Nappaatit tunillaassortut akiorneqarnissaannut inatsit nutaaq sisamanngornermi Inatsisatunit akuerineqarpoq, inatsilli ukioq ataaseq sinnilaaginnarlugu atuutissaaq - tassa 2023-mi juulip aallaqqaataata tungaanut.
Inatsisartut ataatsimoorlutik piumasarisimavaat, inatsimmik atorunnaarsitsinissamik aalajangersaasoqassasoq, tassani Naalakkersuisut nappaatit tunillaassortut akiorniarlugit inatsimmi nutaami killilersuutigitinniagaannik peqqusutiginiagaanngillu Inatsisartut nakkutiginninnissamut periarfissinneqanngimmata.
Inatsisartutigut nakkutiginnittoqartillugu ataatsimiititaliami Inatsisartuni ilaasortanik inuttalimmi nappaatinik tunillaassortoqarnerani killilersuutinik atuutsitseqqilertoqassappat, killilersuutissatut aalajangerneqartunik akuersissuteqarnissamut itigartitsinissamulluunniit periarfissinniarlugit.
Apeqqut tunngaviusoq
Inatsisartutigut nakkutiginninnissaq pillugu apeqqut Inatsisartut suleriaasiannut tunngaviuvoq. Ilaqutariinnut Peqqissutsimullu Ataatsimiititalip inatsimmut nutaamut atatillugu isumaliutissiissutaani allassimavoq, Inatsisartut Siulittaasoqarfianit Naalakkersuisut marloriarluni allaffigineqarsimasut - siullermik 2021-mi januaarip qaammataani allaffigineqarsimallutik.
Siulittaasoqarfimit oqaatigineqarsimavoq, inatsit nutaaq danskit nappaatinut tuniluuttunut inatsisaannik assilisaammat, Naalakkersuisut danskit inatsisaanni inatsisartoqarnikkut nakkutiginnittarnermut tunngasoq ilanngussimasariaqaraluaraat:
- Siulittaasoqarfimmit qangali oqaatigisarsimavarput, COVID19-imut atatillugu inissisimanerit pillugit ilungersunarluinnartunik aalajangiissuteqartoqassatillugu Inatsisartut akuliutsinneqartassasut, aamma innuttaasut suliffeqarfiillu periarfissaannut annertuumik sunniuteqartussanik aalajangiisoqartussaatillugu, taamaammat taamatut ingerlatsinermi inatsisartutigut nakkutiginnittoqartarnissaa pisariaqarpoq, siulittaasoqarfik 2021-mi januaarip qaammataani Naalakkersuisunut allassimavoq.
- Siunertamut naapertuutinngitsoq
Naalakkersuisut oqaatigaat, inatsisartutigut nakkutiginnittarnissaq "siunertamut naapertuuttuaannarnavianngitsoq, Kalaallit Nunaanni Danmarkimilu politikkikkut aaqqissuussat assigiinngitsuummata."
Naalakkersuisut taamaalillutik kissaatigineqartoq inatsimmut nutamut ilanngussimanngilaat, tassungali taarsiullugu inatsisartutigut nakkutiginnittarnerup atuutsinneqalernerani kinguneqaataasinnaasunik misissuisoqartarnissaa ilanngussimavaat. Tamanna Ilaqutariinnermut Peqqissutsimullu Ataatsimiititaliamit tusaatissatut tiguneqarsimavoq, Naalakkersuisullu tamanna puigunnginniassammassuk nappaatit tunillaassortut akiorniarneqarnerat pillugu inatsitsip atorunnaarsinneqarnissaanut ulluliisoqassasoq piumasaralugu.
Tunillaassortumik nappaalanersuaqarneranut inatsit inuiaqatigiit nappaatinut tuniluuttunut illersuuatigissavaat.
Naalakkersuisut pissaaneqarnerulersissagai
Nappaatit tunillaassortut akiornialugit inatsimmi nutaami allannguutaasoq annerpaaq tassaavoq, Nappaalanersuaqarneranut ataatsimiititaliap peqqussutissanik aalajangersaasarunnaarnissaaa.
Nappaalanersuaqarneranut Ataatsimiititaliap maannammut peqqussutigisimavai nakorsamit misissorneqartarnissaq, angerlarsimaffimmi imminut mattusimatinnissaq, pinngitsaaliissumik unitsitsisoqartarnissaa aamma nunap immikkoortuinik matusisarnissaq. Ilaqutariinnermut Peqqissutsimullu Ataatsimiititaliap siunnersuut pillugu isumaliutissiissutaani taamatut allassimasoqarpoq.
Pissaaneq tamann inatsit nutaaq aqqutigalugu Naalakkersuisunut nuunneqarpoq, Nappaalanersuaqarneranilu Ataatsimiititaliaq siunnersuisartututut taamaallaat atuuttussanngorluni.
Politimesteri: Naalakkersuinikkut akuliuttussaannginneq atorunnaarsinneqarpoq
Politimesteri Nappaalanersuaqarneranut Ataatsimiititaliami siulittaasuuvoq, tusarniaanermullu akissummini allassimallui, inatsisip nutaap atuutsinneqalerneratigut naalakkersuinikkut akuliuttussaannginneq atorunnaarsinneqarluni.
Naalakkersuisut allannguinerminnut tunngavilersuutigisimavaat, nappaalanersuaqarnerani "eqqortumik, sukkasuumik naleqquttumillu" iliuuseqartoqanngippata Naalakkersuisut akisussaasuusussaanerat.