Inatsisartut immikkut ittumik ataatsimiigiaqquneqartut
Inatsisartut Naalakkersuisoqatigiit suleqatigiinneranni allannguutit tunngavigalugitpingasunngornermi immikkut ittumik ataatsimiissapput.
Aningaasanut inatsisissaq marlunngornermi akuersissutigineqarpoq, taamalu ukiakkut ataatsimiinneq naammassineqarluni.
Politikkerilli immikkut ittumik ataatsimiinnissamut pingasunngornerup unnuaani aggersarneqasimapput. Immikkut ittumik ataatsimiinnissaq sivikitsunnguussaaq, tamannalu ullumi pingasunngornermi pissaaq.
Ataatsimiigiaqqusinermut tunngaviuvoq Naalakkersuisooqatigiit suleqatigiinneranni allannguisoqarsimanera, ullormullu oqaluuserisassat naapertorlugit marluinnaat oqaluuserineqassapput:
- Siulittaasoqarfimmi siulittaasuup tulliinik qinersineq
- Ataatsimiititalianut inatsisit malillugit pilersinneqartussanut ataatsimiititalianullu ataavartunut ilaasortanik sinniisussanillu qinersineq
Ataatsimiinneq nalunaaqutaq 15.00 aallartissaaq, tassa Naalakkersuisuni nikittoqarnerata aqanguani.
Nikisitsisoqarnerani Mariane Paviasen (IA) Naalakkersuisunngortinneqarpoq, Asii Chemnitz Narup (IA) Aningaasaqarnermut Naalakkersuisutut tunuarpoq. Asii Chemnitz Narup Naalakkersuisuunermini Inatsisartuni sulinngiffeqarsimavoq.
Asii Chemnitz Narupip Inatsisartuni ilaasortanngoqqinnissaa naatsorsuutigineqarpoq, Naalakkersuisunilu ilaasortat akornanni Inatsisartuni sulinngiffeqartarneq ileqquummat, Mariane Paviasen sulinngiffeqarnissamik qinnuteqassasoq ilimanarluinnarpoq.
Mariane Paviasen sulinngiffeqarnissamik qinnuteqassappat ataatsimiititaliani ilaasortat allanngortinneqassapput, Mariane Paviasenimi ilaatigut Inatsisartuni siulittaasup tullianut sinniisussaavoq, aamma Inuussutissarsiornermut Aatsitassanullu Ataatsimiititaliami siulitaasutut, ukiaq uranimut inerteqquteqarnissap suliarineqarnerani sunniuteqarluarsimalluni. Mariane Paviasen aamma Eqqissisimatitsinermut Avatangiisinullu Ataatsimiititaliami siulittaasuuvoq.