Inatsisartut ataatsimiinnerat aallarnerlugu Naalakkersuisuni nikisitsisoqassaaq

Inatsisartuni ilaasortat ataatsimiinnerup ulluisa aappaanni oqaluuserisassaat siulleq tassaavoq, Naalakkersuisussanik toqqaaneq.

Inatsisartuni ilaasortat ataasinngornermi ullup-qeqqata siorna aqqanernut ukiakkut ataatsimiinnertik aallartippassuk, Naalakkersuisuni nikisitsisoqassaaq.

Naalakkersuisut Siulittaasuata Múte B. Egedep (IA) tallimanngormat ukiakkut ataatsimiinneq ammaanersiorlugu oqalugiaataa, ataasinngornermi partiit siullertut oqaluuserisussaagaluarpaat.

Siulittssulli oqalugiaataa pillugu oqallittoqartinnagu oqaluuserisassaq nutaaq ilanngunneqarsimavoq - tassalu Naalakkersuisussanik toqqaanissaq.

Sermitsiaq.AG-p paasisimasai naapertorlugit, Naalakkersuisunik nikisitsinermi Pele Broberg (N) nunanut allanut naalakkersuisuujunnaartinneqassaaq, aamma meeqqanut, inuusuttunut ilaqutariinnullu naalakkersuisussamik nutaamik toqqaasoqassaaq.

Apersorneqarsimaneq oqallitsitsingaatsiartoq

Pele Brobergip Danmarkimi tusagassiorfimmit Berlingskemit apersorneqarami oqaaserisimasaasa kingunerannik nikisitsisoqarniarpoq. Apersorneqarsimanera sapaatip akunnerani kingullermi sapaatikkut tamanut saqqummiunnqarpoq.

Pele Brobergip apersorneqarnermini oqaatigaa, Kalaallit Nunaata namminersulivinnissaa pillugu taasisoqarnerani kikkut taasisinnaatitaassanersut oqallissaarutigaa.

IA-p nuna tamakkerlugu ataatsimeersuarnerata nalaani oqaaseqaatai tamanut saqqummiunneqarput, oqaaseqaatigisimasaalu partiimi ilaasortanit naammagineqanngilluinnarlutik.

Nuna tamakkerlugu ataatsimeersuartoqarnerani IA-mi politikkikkut siulittaasup tulliata Aqqaluaq B. Egedep oqaatigaa, nunanut allanut tunngasutigut suliassaqarfimmi nikitsitsisoqarnissaa sulissutigineqartoq.

Powered by Labrador CMS