Ukiakkut ataatsimiinneq
Inatsisartut ammaanersiorneranni inngerneq
Anda Kuitsep aamma Nuka Alice Lundip Inatsisartut ataatsimiinnerat inngerlutik ammarpaat.
Ukioq manna Inatsisartut siulittaasoqarfiani Nunatsinni inatsisiliortut ataatsimiinnerani ileqqusamik nutaamik akuersissuteqartoqarpoq: Inatsisartut ataatsimiinnerisa ammarneqarnerani inngerneq.
Ullumi tallimanngornermi siullermeerluni Inatsisartut inngertoqartillugu ammarneqarpoq, Anda Kuitse aamma Nuka Alice Lund inngertoralugit.
Nipilersortartoq tamatigoortoq Leif Saandvig Immanuelsenip inngertoqartalernissaanik siunnersuuteqartuuvoq. Taassuma siorna novembarimi Inatsisartuni ataatsimiittoqarnerani siunnersuutini tunniuppaa.
Atuaruk: Inatsisartuni qilaatersorneq
- Siunnersuut suliarigakku Inatsisartut ataatsimiinnerisa ammaanersiortarnerat eqqarsaatinnippoq. Tassani persuarsiorlutik ingerlaqatigiissinnarlutik naalagiartarput, taamalu Inatsisartuni ilaasortat Guutip oqaasiinik pilluaqquneqartarlutik.
- Naalagiarnermiilli nalunaaquttap akunneri arlaqanngitsut qaangiutiinnartut illuatungeriit imminnut saassutarilersarput ilaatigut inunnik ataasiakkaanik malersuinermut eqqaanarsinnaasumik pissusilersorlutik. Pissutsit taamaannerat nukillalaarnangaarami quinannaannangajapporluunniit, Leif Saandvig Immanuelsen AG-mut taamani oqarpoq.