Inatsisartunut siunnersuut: Ilaqutaasut unnuiffigisinnaasaannik pilersitsisoqarli
Partii Naleqqaminngaanneersoq Anthon Frederiksen Inatsisartunut siunnersuutaani, Kalaallit napparsimasut danmark-imi katsorsartittarnerannut atatillugu ilaqutaasut ineqartinneqartarnerannut atatillugu, katsorsarneqartussaq rigshospital-imi napparsimmavimmiluunniit allami suliarineqassatillugu ilaqutaasut unnuiffigisinnaasaannik pilersitsisinnaanerata iluaqutissartai aammalu aporfissarisinnaasaasa Naalakkersuisut misissussagaat
Kalaallit Danmarkimut suliaritikkiartornerini ilaqutaasut atugaat pitsaanerusariaqarluarput.
Taama isumaqarpoq Inatsisartuni ilaasortaq Anthon Frederiksen (PN), taanna Inatsisartunut siunnersuuteqarpoq napparsimasut Danmarkimut suliaritikkiartornerini ilaqutaasut unnuiffigisinnaasaannik pilersitsinissamik iluaqutissartaanik aporfissartaalu Naalakkersuisut misissussagaat.
- Tassami napparsimasumut pingaaruteqartorujussuuvoq nappaammik katsorsarneqarnermini erloqissutimi saniatigut allanik erloqissuteqarani toqqissisimasumik qanigisaminik ilaqarnissaa, Anthon Frederiksen siunnersuummini allappoq.
Tamanut toqqissisimananngitsoq
Taassuma tusarsimavaa, ilaaqutaasut qanigisartik suliaritinnerata nalaani napparsimasut inaanniit napparsimavimmut nuunneqarnerini napparsimasut inaanni unnuisinnaasannginnertik iluarinngikkaat.
- Pissutsit taamaattut napparsimasumut ilaqutaasumullu toqqissisimananngilluinnartut isumaqarpugut iluarsisariaqartut. Aamma pissutsit taammaattut katsorsartittumut iluaqutaanngilluinnarmata, Anthon Frederiksen erseqqissaavoq.
- Taamaammat siunnersuutigaarput Naalakkersuisut peqquneqassasut qulaani misissuisitsineq taaneqartoq ingerlatissagaat, tunngavissaqarluartumik oqallinnissaq pillugu aammalu neriunartumik napparsimasut ilaqutaannut Danmarkimi toqqissisimanartumik unnuiffiusinnaasumik pilersitsisoqarnissaa aalajangiiffigineqarsinnaaleqqullugu, Anthon Frederiksen allappoq.
Ulloq 17. oktober siunnersuut Inatsisartut siullermeerutigissavaat.
