Inatsisartunut qinersinissamik marlunngorpat suaaruteqartoqarsinnaavoq
Inatsisartut ataatsimiilerpata aqagu marlunngornermi, Inatsisartunut qinersititsisoqarnissaa oqallisigineqassaaq. Partiit sisamat qinersisoqarnissaa piumasaraat.
Inatsisartunut qinersititsisoqassanersoq Inatsisartunut ilaasortat aqagu oqallisigissavaat. Oqallisissiaq siullermeerneqassaaq, aappassaaneerneqassaaq pingajussaaneerneqassallunilu. Taamaattumik Inatsisartunut qinersisoqarnissaa aqagu suaarutigineqarsinnaavoq.
- Matumuuna Inuit Ataqatigiit, Demokraatit, Partii Naleraq Atassullu sinnerlugit Inatsisartunut immikkut ittumik qinersineq pillugu Inatsisartut Inatsisaattut siunnersuut saqqummiutissavara, partiit sisamat siunnersuuteqartuusut allapput.
Inatsisartut Siulittaasoqarfiata siunnersuut ullumi partiinit taakkunanit sisamanit tiguaat, nalilersoreerlugu oqallisigineqarnissaa akuerineqarpoq.
Taamaattumik Inatsisartuni ilaasortat aalajangiisussanngorput ilumut Inatsisartunut qinersisoqassanersoq.
- Nunatta inuisa ataatsimoornerulernissartik pisariaqartippaat, maannalu pissutsit attanneqarsinaanngitsumi inissisimaleqqapput, tamannalu tunngavigalugu inatsisissatut siunnersuut manna saqqummiupparput. Maanna politikkikkut pissutsit attanneqarsinaanngitsumik inissisimanerat peqqutigalugu qinersinissaq avaqqunneqarsinnaanngilaq, partiit pineqartut sisamat siunnersuummi allapput.