Ukiakkut ataatsimiinneq
Inatsisartuni ulloq takissamaartoq
Ukiakkut ataatsimiinnermi ullormi kingulliusussaagaluami, naalakkersuinermik suliaqartut oqaluuserisassat immikkoortut 22-t suliarissavaat.
Inatsisartunut ilaasortat ullumi immikkoortut 22-t suliarissavaat.
Taakkulu nalunaarasuartaatitigut attaveqaatinit, nioqqutissat akiinut aamma siusinaarluni pensionisianiit angallatikunut, aatsitassarsiornermit aningaasaateqarfimmiit meeqqanut tunngassuteqarput.
Aalisarnermut inatsisissatut siunnersuut nutaaq oqallisaanerpaassagunarpoq, taanna siullermeerneqassaaq, aatsaallu upernaakkut ataatsimiinnermi aappassaaneerneqarlunilu pingajussaaneerneqassaaq.
Oqaluuserisassat taama amerlatigisut suliarineqarnissaasa piviusorsiortuunera, aalisarnermut inatsit eqqaassanngikkaanni inatsisissatut siunnersuutit tamarmik pingajussaaneerneqartussaaneranik pissuteqarpoq. Taakkulu oqallisaavallaaratik akuerineqarajuttarput.
Pilersaarut malillugu ukiakkut ataatsimiinnermi ulloq kingulliusussaagaluarpoq. Kisianni ataasinngorneq saniatigut ataatsimiiffissatut ilanngunneqarpoq, aningaasanut inatsisissap suliarineqarnissaa angumeriumallugu. Imigassamut inatsisissap naammassineqarnissaa aamma ataasinngornermut nuunneqarnikuuvoq.