Inatsisartut

Inatsisartuni siunnersuut: Sillimmasiisarfittaartariaqarpugut

Kalaallit Nunaat Namminersorlutik Oqartussanit pigineqartumik sillimmasiisarfittaarnermigut aningaasarpassuarnik sipaaruteqarsinnaavoq, Partii Naleqqameersoq Anthon Frederiksen taama isumaqarpoq.

Medlem af Inatsisartut Anthon Frederiksen (PN) ser gerne, at der bliver etableret selvstyreejet forsikringsselskab her i landet. Hans forslag skal førstebehandles i Inatsisartut onsdag

Maani Nunatsinni sillimasiisarfimmik Namminersorlutik Oqartussanit pigineqartumik sillimmasiisarfittaarnissaanik, Inatsisartunut ilaasortaq Anthon Frederiksen (PN) siunnersuuteqarpoq.

- Aningaasaqarneq iluaquserneqassaaq, aningaasat nunatsinniit aniaannartussaagaluit uninngatiinnarneqarsinnaasut, taanna siunnersuummini allappoq.

Aningaasat aniapput
Siunnersuut imaappoq: Kalaallit Nunatta pigisaannik sillimmasiisarfimmik pilersitsinerup iluaqutissartai aammalu aporfissarisinnaasaasa misissorneqarnissaanik, ilanngullugu pilersitsinerup suut piumasaqaatitariumaagai, soorlu aningaasartuutissat aammalu sulisussat pillugit Naalakkersuisut peqquneqassasut inatsisartut aalajangiiffigisassaattut siunnersuut.

- Ukiorpassuanngulersuni naalakkersuinikkut eqqartorneqartuarpoq, aningaasat ilami aningaasarpassuit nunatsinni annerusumik kaaviiaartinnagit sulisinnagillu nunatsinniit avammut aniatiinnartakkatta qanoq iliornikkut nunatsinnut iluaqutaanerusumik aqqiivigineqarsinnaanerat, taanna oqarpoq.

Aningaasaqarnermut iluaqutaasinnaasoq
- Kommuneni namminersortunilu aammalu inuit ataasiakkaat sillimmasiinermut aningaasat minnerpaamik arlariinnik millionilikkaat tungaanut atorneqartartut ilimagineqarpoq, taamaammat kalaallit nunaata ukiumut sillimmasiinermut atortagai 100 mio. kr.-it sinnersimassagai nalilerneqarsinnaavoq, taanna oqarpoq, taamaammallu sillimmasiisarfimmik siunnersuuteqarpoq.

Anthon Frederiksenip ilisimavaa, paasisinnaalluarlugulu illoqarfinni assigiinngitsuni sillimmasiisarfiit avataaneersut immikkoortortaqarfiliorsimasut.

- Minnerunngitsumik Namminersorlutik Oqartussat aammalu Namminersorlutik Oqartussat suliffeqarfiutaasa sillimmasiinermut ukiut tamaasa aningaasat atortagaat eqqarsaatigalugit. Partii Naleqqami qularutiginngilarput sillimmasiisarfimmik Namminersorlutik Oqartussat pigisaannik pilersitsineq kalaallinut inuiannut iluaqutaasinnaasoq, aammalu nunap aningaasaqarneranut, Anthon Frederiksen oqarpoq.

Siunnersuut ullumi pingasunngornermi siullermeerneqassaaq.

Powered by Labrador CMS