Inatsisartuni ilaasortat arlallit ataatsimeeqataasanngitsut

Inatsisartuni upernaakkut ataatsimiinnermi ataatsimiittut peqataasartut amerlagisassaasanngillat. Illuatungiliuttut qatsulluinnarpaat naalakkersuisuutitaqartunut taasinerminnik paarlaassinissamut isumaqatigiissusiortariaqartarnertik, taamatullu inatsisartuni ilaasortanik suliumasunik kissaateqarlutik.

Inatsisartuni upernaaq manna ataatsimiinnermi ataatsimiittarfik inukisaallattaaginnavippoq. Ataatsimiinnerit aallartinnerani nalunaarutigineqartuarpoq inatsisartuni ilaasortat arlallit akornanni taasinissamut isumaqatigiissuteqartoqarsimasoq, ataatsimiinnissamut peqataasinnaannginneq pissutigalugu.

Taasisarnerit pillugit isumaqatigiissuteqarniartoqartuarnera illuatungiliuttunut Inatsisartunilu sulinermi ilungersunartuusoq, Demokraatit siulittaasuat Jens-Frederik Nielsen oqarpoq:

- Inatsisartut ikinnerusut suliassarparujussuit upernaaq manna kivinniarsaraat. Uagut soorunami oqaaseqaasiortarpugut ataatsimiittarfimmilu oqalliseqataasarluta. Taasinissarli pillugu isumaqatigiissuteqarnermi taasisinnaasannginnerput soorunami iluaangaarput. Killissarput tikilluinnarparput, Jens-Frederik Nielsen oqarpoq.

Taasinissaq pillugu isumaqatigiinneq naligiissaaneruvoq

Taasinissaq pillugu isumaqatigiissusiorsimasut:

Upernaaq manna ataatsimiinnermi taasinissaq pillugu isumaqatigiissusiorsimasut uani ataani takusinnaavatit. Partiit taasinissaq pillugu isumaqatigiissusiorumallutik saaffiginnissimasut allaqqapput, partiilli taasinissamik isumaqatigiissuteqartut taaneqaratik.

Ataatsimiinneq 1: Isumaqatigiinnerit 4 (IA: 4)

Ataatsimiinneq 2: Isumaqatigiinnerit 3 (IA: 3)

Ataatsimiinneq 3: Isumaqatigiinnerit 4 (IA: 4)

Ataatsimiinneq 4: Isumaqatigiinnerit 3 (IA: 3)

Ataatsimiinneq 5: Isumaqatigiinneq 1 (S: 1)

Ataatsimiinneq 6: Isumaqatigiissusiortoqanngilaq

Ataatsimiinneq 7: Isumaqatigiinnerit 2 (IA: 2)

Ataatsimiinneq 8: Isumaqatigiinnerit 3 (IA: 3)

Ataatsimiinneq 9: Isumaqatigiinnerit 3 (IA: 2, D: 1)

Ataatsimiinneq 10: Isumaqatigiinneq 1 (IA: 1)

Ataatsimiinneq 11: Isumaqatigiinneq 1 (IA: 1)

Ataatsimiinneq 12: Isumaqatigiinnerit 3 (IA: 3)

Ataatsimiinneq 13: Isumaqatigiinnerit 4 (IA: 3, S: 1)

Ataatsimiinneq 14: Isumaqatigiinnerit 5 (IA: 5)

Ataatsimiinneq 15: Isumaqatigiinnerit 4 (IA: 4)

Ataatsimiinneq 16: Isumaqatigiinnerit 4 (IA: 4)

Ataatsimiinneq 17: Isumaqatigiinnerit 6 (IA: 3, D: 2, A: 1)

Ataatsimiinneq 18: Isumaqatigiinnerit 6 (IA: 3, D: 2, N: 1)

Ataatsimiinneq 19: Isumaqatigiinnerit 4 (IA: 4)

Paasisat: Inatsisartuni ullormut oqaluuserisassat nassuiarneqarneri. ina.gl.

Taasisarneq pillugu isumaqatigiissuteqartarnerup Inatsisartunut ilaasortat sulinngiffeqarallarnertik imaluunniit allanik pissuteqarlutik Inatsisartut ataatsimiinnerini peqataasinnaanngitsut, sinniisussaannik qaaqqusisarnissamik pisariaqartitsinerup killilersimatinnissaanik siunertaqarpoq. Taama aaqqiinerup illuatungeriit taasinerisa oqimaaqatigiinngissinnaanerannik naligiissaarinerusarpoq.

Demokraatit paasisinnaalluarpaat aalajangersimasunik pisoqartillugu, soorlu sapaatip akunnerani matumani Future Greenland ingerlanneqarmat, Inatsisartuni ilaasortat taasinissaq pillugu isumaqatigiissusiornissamik pisariaqartitsilersinnaasarneri. Partiilli ilaasa ersarissumik peqquteqartigatik taama isumaqatigiissusiukulaneri, qatsulluinnarpaat.

- Eqqaamaneqartariaqarpoq aamma qinigaavugut, inuiaqatigiinnullu angisoorujussuarmik akisussaaffeqarpugut. Taasisarneq pillugu isumaqatigiissutinik taamaallaat atuiniaraanni sulinngitsoortarlunilu, taava eqqarsaatigineqartariaqarpoq sulinngiffeqarnissap qinnutigiinnarnissaa pitsaanerunnginnersoq, Jens-Frederik Nielsen oqarpoq.

Taasinissaq pillugu isumaqatigiinnerit ullormut arlallit

Upernaakkut ataatsimiinnermi matumani taasinissaq pillugu isumaqatigiissusiornerit ullut tamangajalluinnaasa pisarput. Inatsisartut maanna 19-eriarlutik ataatsimiissimalerput, 2. juunillu tungaanut ullut ataatsimiiffiusut suli arfiniliullutik. Maannamut ulloq ataaseq kisimi taasinissaq pillugu isumaqatigiissusiorfiusimanngilaq. Ullut ataatsimiiffiusut sinnerini ilaasortaq ataaseq arfinillillu akornanni taasinissaq pillugu isumaqatigiissusiortarsimapput, taamaasillutik Inatsisartuni ilaasortat 31-iusuni aqqaneq-marluk tikillugit ataatsimiinnermi taasinissamut periarfissaqartarsimanatik. Inatsisartut affaat taasisinnaallutik ataatsimiittarfimmiikkaangata Inatsisartut aalajangersinnaatitaasarput.

Naleqqap paasisinnaalluarpaa taasinissaq pillugu isumaqatigiissutit ilaatigut pisariaqarsinnaasartut. Taamatulli isumaqatigiissusiornerit akulikitsillugit ataatsimiititaliani sulinerit aamma kipiluttunarsisarneri Pele Brobergip tikkuarpaa:

- Taasisarneq pillugu isumaqatigiissusiornerit ataatsimiittarfimmi tamat oqartussaanerat pillugu sulinermik kisimi eqquisanngilaq. Aamma ataatsimiititaliani sulinerit kalluarneqartarput ilaasortat peqataanngileraangata. Taamaammat ilisimagaanni ataatsimiinnerni arlalinni tulliuttuni peqataasinnaanani, sulinngiffeqarnissaq eqqarsaatigineqarsinnaavoq, sinniisussamik aggersaanissaq anguniarlugu, Pele Broberg Sermitsiaq.AG-mut oqarpoq.

Akisussaaffimmik tigusigitsi

Demokraatit aamma Atassut illuatungiliuttutut teknikkikkut suleqatigiipput, Nalerarlu teknikkikkut suleqatigiinnermit peqataanani. Partiit annerit marluusut, Inuit Ataqatigiit aamma Siumut naalakkersuisoqatigiipput.

Partiit annerusut marluk partiinut allanut taasinissaq pillugu isumaqatigiissusiorniarlutik saaffiginnikkaangata, illuatungiliuttut akornanni sunniuteqarnissaq kipungalersinnaasartoq, Atassummi siulittaasup, Aqqalu Jeremiassenip tikkuarpaa.

- Partiinut anginernut marlunnut taasinissaq pillugu isumaqatigiissusiornissaq malunnaateqartussanngitsutut immaqa isiginarsinnaagaluarpoq. Uagutsinnulli, soorlu marlunnik ilaasortaatitaqartunut, taasisinnaajunnaavinnermik kinguneqarsinnaavoq, Aqqalu Jeremiassen oqarpoq:

- Qinigaavugut sulissalluta, qinikkatullu akisussaaffeqarpugut angisoorujussuarmik. Akisussaaffimmik tigusisinnaanngikkaanni, taava tamanna nassuerutigineqartariaqarpoq, sulinngiffeqarnissamillu qinnuteqarluni, sinniisut sulilerniassammata. Taasinissaq pillugu isumaqatigiissusioqattaarnerit assigiinnarpaa sulinngitsoortaarnerit, Aqqalu Jeremiassen oqarpoq.

Powered by Labrador CMS