Inatsisartuni ilaasortaq: Najukkami ilinniartitsinermi sulisussaaleqineq qaangerniarneqarsinnaavoq

Ilaqutariinnermut Peqqissutsimullu Ataatsimiititaliaq Tiliup sapaatip akunnerata siuliani ataatsimeeqatigai. Tiliup Qaanaami angalanerminit nalunaarusiaani pissutsit oqaluttuarineqartut, Inatsisartuni ilaasortap ilisarisinnaavai. Innersuussutit ilaat tassaapput ilinniartitaaneq, pikkorissaaneq paasititsiniaanerillu.

Inatsisartut ukiaanerani ataatsimiinnerat aallartimmat, Ataatsimiititaliaq nutaamik ivertinneqarsimalerpoq. Maanna ataatsimiititaliami siulittaasup tulleriligaa, Mikivsuk Thomassen, Tiliumik sapaatip akunnerata siuliani ataatsimeeqateqarnermi peqataavoq. Taanna aamma Qaanaameersuuvoq:

- Tiliup nalunaarusiamini ajornartorsiutit taakkartugai ilisarisinnaavakka. Nalunaarusiaq eqqortumik saqqummiivoq, aamma annertuumik misissuisimanerat qujanarpoq pisariaqarlunilu, Mikivsuk Thomassen Sermitsiaq.AG-mut oqarpoq.

Taanna isumaqarpoq najugarisaq qimannagu ilinniartitsisalernissaq sulissutigisariaqartoq, inuit innarluutillit sullinneqarnerini sulisunik ilinniarsimasunik naammattunik sulisoqalernissaq anguniarlugu. Suliarlu taanna qaqikkumavaa.

- Najugaq qimannagu ilinniarsinnaaneq periarfissaasariaqarpoq.

Najugaq qimannagu ilinniarsinnaanerit illoqarfinni nunaqarfinnilu isorliunerusuni amerlanerni periarfissaasariaqarpoq, isorliunerusunimi inuit innarluutillit pillugit sullissisut amigaatigineqarnerat takornartaanngilaq. Najugaq qimannagu ilinniarsinnaaneq atorneqarpat, illoqarfinni ilinniarfiusuni kollegiassaaleqineq aamma oqilisarneqassaaq, Mikivsuk Thomassen isumaqarpoq.

Tikinneqakulanerusariaqarput

Qaanaaq aamma illoqarfiit nunaqarfiillu isorliunerusut inunnik innarluutilinnik tapersersuiniarlutik ikiuutissanik unammilligassaqarnerat aaqqinniassagaanni oqartussat suugaluartut tamarmik ikioqatigiittariaqartut, Inatsisartuni ilaasortap nalilerpaa.

Isorliunerusunulli attaveqarnerup qaqugukkulluunniit kipineqannginnissaa aamma pingaaruteqarpoq. Illoqarfiimmi Qaanaatut isorliutigisut suli tikikkuminaannerusutut avinngarusimalluinnartutullu inissittoorsinnaasarput:

- Naammanngilaq pissutsit nutaat tusagassiorfitsigut tusartarnissaat. Avammut attaveqarneq maanna radiokkut tv-kkullu ingerlavoq, allatut attaveqarniarneq kipiluttunarpoq. Qaanaamut nunaqarfiinullu kiinnerluni attaveqarneq ataavartoq pisariaqarpoq, illoqarfik nunap ineriartorneranut malinnaassappat, Thomassen oqarpoq.

Taassuma erseqqissarpaa inuit innarluutillit tapersersorneqarnissaat pillugu inatsit januarimi atuutilersoq, tusagassiorfitsiguinnaq Qaanaami tusarneqarsimasoq. Aatsaallu Tilioq tikilluni nassuiaammat innuttaasut inatsit pillugu ersarinnerusumik paasitinneqarsimasut.

- Qaanaaq illoqarfiillu isorliunerusut oqartussanit tikeraarneqakulanerusariaqarput, oqartussanut attaveqarneq ataavartoq anguneqaqqullugu, oqarpoq.