Skip to main content

Inatsisartuni ilaasortaq: Allaffissornikkut oqaatsitigut marloqiusamik ingerlatsineq qimanneqarli

Nunatsinni innuttaasut oqaatsitik atorlugit pisortaqarfinni sullinneqartariaqartut, Inatsisartuni ilaasortaq Vivian Motzfeldt (S) isumaqarpoq. Taassuma kissaatigaa, qallunaat oqaasii pisortaqarfinni atorunnaarneqarnissaat

- Allaffissornikkut oqaatsitigut marloqiusamik ingerlatsinitta akisoqisup qimanneqarnissaa piffissanngorluinnarpoq. 

Inatsisartuni ilaasortaq Vivian Motzfeldts (S) oqallisissiatut siunnersuutaa taama aallartippoq.

Taanna kissaateqarpoq, Kalaallit Nunaat 'allaffissornikkut oqaatsitigut marloqiusamik ingerlatsineq qimanneqarnissaa' sulissutigisariaqaraa, qallunaatullu oqaatsit pisortaqarfinni atorunnaarneqarnissaat.

- Oqaatsivut atorlugit allaffissornikkut ingerlatsineq anguneqarpat Kalaallit 60 %-ii pallillugit qallunaatut allatulluunniit oqaaseqanngitsut naammaginartumik aamma psirotanit sullinneqarnerat anguneqassaaq, taamaalilluni ilutigitillugu ineriartorneq killiffitsinnillu akisussaaqataanermik misigineq tigusinerlu anguneqassaaq, Vivian Motzfeldt allappoq.

Piffissaajaataallunilu aningaasartuutaasoq

Taanna erseqqissaavoq, allaffissorneq pitsaanerusumik akunnaannerusumillu ingerlanneqarsinnaasoq.

- Naalagaaffinngornissaq ukiuni makkunani annertuumik timitalersukkamik sulissutigineqaleruttorpoq. Allaffissorneq akisoqisoq amerlassuttitsinnullu naapertuutinngivissoq ukiorpassuarni atuutsinneqarpoq, marloqiusamillu ingerlatsinerup suliassat eqaannerujussuarmik naammassineqarsinnaasut ajoraluartumik piffissaq sivisoorujussuaq atorlugu ingerlanneqartarput, allaat ineriartutsaaliuinertut ilaatigut misinnartarlutik, Vivian Motzfeldt tikkuaavoq.

Tamannali allamiuluarnertut imaluunniit takornartat oqaasiinik atuerusunnginnertut paasineqarnissaa kissaatiginangu erseqqissaatigaa.

- Imalli paasineqassasoq kissaatigaara oqaatsitta ukiorpassuarni atorneqarsinnaanngitsutut naqissuserneqarlutik nikagisaallutillu inuluugineqarsimanerannik atorunnaartitserusulluta oqaatsittalu kinaassutsitsinnut aamma tunngaviliisuummata, inuiaasugut ikittunnguit oqaatsiminnik piujuaannartitserusuttut ineriartortitserusuttullu, Vivian Motzfeldt oqarpoq.

Tikisitat

Vivian Motzfeldtip aamma eqqaavaa 'tikisitsinermilu siunertaasariaqarpoq tikisitap nunaqavissumik piginnaasatigut pikkorissaanissaannik akisussaaffimmik tigusinissaa angujumallugu' 

- Tikisitap immikkut piginnaanillip nunaqavissumut pikkorissaanini naammassiguniuk tikisitap suliassaa naammassineqarsimassaaq, taamaalilluta imminut napatittumik ingerlanerput annertusassavarput avataaniillu iluaqusersorluta ingerlasariaqarnerput annikillisarlugu, tamatuma kingunerissavaa piginnaanitsinnik ingerlatitseqqiisarnerput uatsinnit toqqammaveqarluni ingerlaavartunngortinneqarnera, Vivian Motzfeldt oqarpoq.

Sammisaq Inatsisartuni 9. november oqallisigineqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER