Skip to main content

Inatsisartuni ataatsimiisitaliap KNR-ip radioqarfimmik pisinera tupigusuutigaa

Inatsisartut kultureqarnermut, ilinniartitaanermut, ilisimatusarnermut, ilageeqarnermullu ataatsimiitsitaliaata KNR-ip radioqarfimmik ‘Voice of Greenland’-imik pisinera pillugu paasissutissanik ujartuivoq

Innuttaasunik sullissinissamut pisussaaffilikkap radioqarfimmik Nuummiinnaq aallakaatitsisartumik, ‘Voice of Greenland’-imik, KNR-imi tuniniaanermut siunnersortimit 500.000 koruunilerlugu pisinera saqqummermalli apeqqutit arlallit pisinermut tunngasut saqqummiunneqarput.

Siullermik Inuit Ataqatigiinneersoq Mimi Karlsen, KNR-ip radioqarfimmik Nuummi kisimi aallakaatitsisartumik pisinerani paasissutissat ersarluttut akissuteqarfigineqarnissaat piumasaraa.

Taassuma kingorna Atassut Nuuk aamma KNR-ip radioqarfimmik Nuummiinnaq aallakaatitsisartumik pisinera eqqumiigalugu nalunaaruteqarpoq.

Atuaruk: KNR-ip sulisuminit radioqarfik pisiaraa

Ataatsimiisitaliap pisineq ajuusaarnartutut nalilerpaa
Maannalu Inatsisartut kultureqarnermut, ilinniartitaanermut, ilisimatusarnermut, ilageeqarnermullu ataatsimiitsitaliaa politikerinut KNR-ip Nuummiinnaq radioqarfimmik allaakaatitsisartumik pisineranut tupigusuutigalugu malinnaasimasunut ilanngulluni saqqummerpoq.

- KNR-ip radiukkut aallakaatitsisarfimmik pisinera unammilleqatigiinnermut innarliisinnaanerluni? 

Taama kultureqarnermut, ilinniartitaanermut, ilisimatusarnermut, ilageeqarnermullu ataatsimiitsitaliaq aperaaq.

Ataatsimiisitaliammi ‘sakkortuumik unammilleqatigiiffioreersumi radiukkut aallakaatitsisarfimmik pisineq tunngaviatigut ajuusaarnartutut isigaa’.

- Takuneqarsinnaagunarpoq pisinermi Kalaallit Kunaanni inuusuttut anguniarneqartut. Ataatsimiititaliamilli qularutigineqarpoq, siunertamut taamatut ittumut radiukkut aallakaatitsissummik illoqarfiit annersaannaanut atorneqarnissaa, Inatsisartut kultureqarnermut, ilinniartitaanermut, ilisimatusarnermut, ilageeqarnermullu ataatsimiitsitaliaani siulittaasoq, Atassummeersoq Steen Lynge, tusagassiuutinut allappoq.   

Atuaruk: KNR-ip Nuummi radioqarfiutiminut allakaatitsinera matoqquneqartoq

KNR nuna tamakkerlugu kisimi aallakaatitsequsaavoq
Soorlu ippassaq sisamanngornermi saqqummiunneqartutut Namminersorlutik Oqartussat innuttaasunik sullissinissamut pisussaaffiligaq piumaffigisimavaat Nuummi kisimi radiokkut allaakaatinneqartup, Voice of Greenlandip, FM-kkut nassitsissutaa sisamanngornermi unnuap qeqqanut qamissagaa, KNR-i nuna tamakkerlugu kisimi radiokkut aallakaatitsitsequsaammat.

Nangillunilu Steen Lynge ataatsimiisitaliaq sinnerlugu aperaaq ‘sumiiffimmi aalajangersimasumiinnaq KNR-ip aallakaatitsisarnissani siunertarineraa imaluunniit radiukkut aallakaatitsisarfimmiit nuna tamakkerlugu aallakaatitsisarniarnersoq ?  

Atuaruk: Nuummi politikerip KNR-ip radioaqarfimmik pisinera apeqquserpaa

Unammillermut tunngasortaanut aperipput
KNR-imi pisortaanerup Søren Lennert Mortensenip siusinnerusukkut ilisimatitsissutigereernikuuaa radioqarfik nutaaq pigiligartik ukiumut ussassaarutinit 1 million koruuninik isertitaqartarniartoq.

Steen Lyngellu oqarnera naapertorlugu radioqarfimmik pisinerup kinguneranik unammilleqatigiinnermut sunniutigisinnaasai ataatsimiititaliamit takujuminaatsinneqarput. 

- KNR radiukkut aallakaatitsisarfik pineqartoq atorlugu ussassaarutinik tuniniaanermi suliffeqarfimmik unammillerfiusumik ingerlatsissava? 

- Apeqqutaasorli unaavoq, tusagassiorfiup inuttaasunut sullissisup, nunattalu karsianit annertuumik taperneqartartup, taamatut illoqarfimmi ataatsimi namminersortunut sullissinermut ilanngunnera ataatsimut isigalugu pissusissamisoortuunersoq?, Inatsisartuni ataatsimiisitaliaq aperivoq.

Atuaruk: KNR-ip radioqarfimmik pisisimanera pillugu IA paasisaqarusuppoq

Ataatsimiititaliap suliaq malinnaaffigeqqissaarniarpaa
Inatsisartut kultureqarnermut, ilinniartitaanermut, ilisimatusarnermut, ilageeqarnermullu ataatsimiitsitaliaata siulittaasua, Steen Lynge, naapertorlugu ataatsimiisitaliaq aalajangersimavoq suliaq malinnaaffigeqqissaassallugu.

- Tamatumunnga atatillugu kultureqarnermut, ilinniartitaanermut, ilisimatusarnermut, ilageeqarnermullu naalakkersuisumut paasissutissanik arlalinnik ataatsimiititaliaq ujartuiniarpoq, taamaalilluni tunisinermi inatsisinik atuuttunik kalluaasinnaaneq unammilleqatigiinnermilu innarliisinnaanerit qulaajaavineqarniassammata, Steen Lynge ataatsimiisitaliaq sinnerlugu allappoq.

KNR-i pillugu allaaserisat allat uani atuakkit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER