Inatsisartuni arnat amerleriartut
Inatsisartuni ilaasortat arlallit inatsisartuniit sulinngiffeqassallutik qinnuteqarneranni sinniisussat issialermata arnat ilaasortaasut 30 procentimik amerleriarput. Naleraq ilaasortaatitamini naligiissitaanermik angusaqarpoq.
Qinersinerup kinguninngua Inatsisartuni arnat ilaasortaasut qulit iserput, oqaluttuarisaanermi aatsaat taama ikileriarsimatigalutik. Inatsisartunili sinniisut ivertinneqareerneranni arnat ilaasortaasut 13-inngorput, Namminersorlutillu oqartussat 2009-mi atulersinneqarmalli arnat qinikkat amerlanerpaasimasut tulliisut maanna inissipput.
Sinniisumik nutaamik, ullumi ataasinngornermi 3. maj ivertitseqqittoqareersorlu Sermitsiaq.AG kisitsigasuarnermini tamanna paasivaa.
Arnat 13-iusut angutillu 18-iusut, tassa imaalerpoq Inatsisartuni 41,94 procentii arnaasut, angutillu 58,06-iullutik.
Naligiissitaanermut siunnersuisoqatigiinni siulittaasoq, Kathrine Bødker arnat Inatsisartuni ikinneri pillugit pakatsissuteqarsimavoq.
- Tamatuma takutippaa naligiissitaanissamik suliaqarnitta sumut killissimanera. Inuiaqatigiittut aaqqissuussaanitta iluani naligiisitaanermut tunngassuteqartut aporfeqartinneqarput, qinersinerullu matuma takuteqqippaa suli anguniagassarpassuaqartugut aamma arnat suli sorsuutissaqartut, Kathrine Bødker qinersineq qaangiussimalersoq Sermitsiaq.AG-mit apersorneqarluni oqarpoq.
Naleraq arnanik isaatitsivoq
Naleraq qinigaaffimmi matumani Inatsisartuni angutinik sisamanik ilaasortaatitaqarluni aallartippoq.
Naleqqamiit Pele Broberg Naalakkersuisunut ilaasortanngorami Inatsisartunit qinigaaffiup sinnera sulinngiffeqassalluni qinnuteqarpoq. Sinniisorlu Paneeraq Olsen ilaasortanngorpoq.
Partiilu arnamik allamik maanna aamma aggersaavoq. Mette Arqe Hammeken, Jens Napaattuup napparsimalluni sulinngiffeqarnerani sinniisuussaaq. Jens Napaattooq Inatsisartunit piffissami killiligaanngikkallartumik sulinngiffeqassalluni qinnuteqarsimavoq, ilaqutariittut pissutsit erloqinartut pillugit videomik siammaasoqareernerata kingorna.
Naleraq Inatsisartuni arnanik marlunnik inatsisartuni ilaasortaatitaqalerami, Inatsisartuni aamma Naalakkersuisuni ilaasortaatitamini suiaassutsikkut naligiissitsilluinnarpoq.