Inatsisartuni amerlanerussuteqartut: Nuuk Imeq 2024-mi kisermaassiunnaassaaq
Inatsisartut puut pillugit nalunaarusiap kingusinnerpaamik ulloq. 1. januar 2024 allanngortinneqassasoq aalajangersimapput.
Inatsisartut ukiorpassuaerni oqaluuserinnittareerlutik aalajangersimapput, Naalakkersuisut immiaaqqat sodavandillu puuinut malittarisassanik nutaanik atuutsitsilernissamut Naalakkersuisut ukioq ataaseq sinnerlugu periarfissaqartinneqassasut.
Inuussutissarsiornermut Aatsitassanullu Ataatsimiititaliami amerlanerussuteqartut naapertorlugit, Nuuk Imiup Kitaani immiaaqqanik sodavandinillu niueruteqarnissamut kisermaassisuunera atorunnaarsinneqassasoq. Inatsisartut oqaaertaliussaq tullinnguuttoq marlunngornermi akuersissutigaat:
"lnatsisartut aalajangiiffigisassaattut siunnersuut: Utertinneqarsinnaasutut Naalakkersuisunit akuerineqarsimappata immiaaqqat sodavandinillu qillertuusanik, plastikkinik igalaaminernillu puullit, ilusaat angissusaallu apeqqutaatinnagit, nunatsinni tamani tunineqarsinnaatinnerisigut Nuuk Imiup kisermaassinerata atorunnaarsinneqarnissaa siunertaralugu immiaaqqat imeruersaatillu kulsyrinik akullit puui pillugit malittarisassanik nutaanik kingusinnerpaamik 1. januar 2024-mi aalajangersaanissamik Naalakkersut peqquneqassasut".
- Alloriarluarneq siulleq
Demokraatit siulittaasuat Jens-Frederik Nielsen siunnersuuteqartuusimavoq, siunnersuullu akuersissutigineqartoq aallaqqaammut siunnersuutigisaanit allaanerungaluartoq akuerineqarnera nuannaarutigaa:
- Taamatut inissisimasoqarnerata allanngortinneqarniarnera isumaqatigiissuteqarsimanerpullu nuannaarutigilluinnarpakka. Soorunami unammillernartoqartussaavoq, mannali alloriarluarneruvoq siulleq, Jens-Frederik Nielsen siunnersuutip inaarutaasumik suliarineqarneranut atatillugu oqarpoq.
Inuussutissarsiornermut Aatsitassanullu Ataatsimiititaliaq isumaliutissiissummini allappoq, puut pillugit nalunaarut Nuuk Imiup unammillerneqarnissaanut toqqaannanngitsumik mattussisuusoq, tamannalu allanngortinneqassasoq.
Nuuk Imeq, SIK Sermersoorlu akerliusimasut
Naleraq siunnersuummut akerliusimavoq, partiimillu ilaatigut oqaatigineqarpoq, kisermaassisuuneq kingusinnerpaamik ulloq 1. januar 2024 atorunnaarsinneqassasoq.
Nuuk Imeq Inuussutissarsiornermut Aatsitassanullu Ataatsimiititaliamut siunnersuut akerleralugu oqaaseqarsimavoq. Nuuk Imermit siulittorneqarsimavoq, niuerfimmik ammanerulersitsineq Nuuk Imiup matuneranik nassataqassasoq, tamatumalu kinguneranik Nuummi maqiterivimmi sulisut 40-t missaanniittut suliffissaarutissasut. Ajornartorsiut tamanna aamma sulisartut kattuffiannit SIK-mit erseqqissaassutigineqarsimavoq.
Nuuk Imermik piginnittuupput Royal Unibrew, Carlsberg aamma Kommuneqarfik Sermersooq.
Kommuneqarfik Sermersuumit aamma siunnersuut akerlilerneqarsimavoq, borgmesterillu Avaaraq Olsenip ataatsimiititaliamut allakkamini ilaatigut siunnersuummi piffissaliussaq isumalluarpallaartutut oqaatigisimavaa, taannalu isumaqarnerarpoq, immiaaqqanik sodavandinillu niuerfiup ammanerulersinneqarneratigut nunatsinni maqiteriviit annaasaqassasut.