Inatsimmut allannguut suliaripallanneqartoq: Inatsisartut digitalikkut maanna ataatsimeeqatigiissinnaanngorput

Inatsisartut coronap tuniluunneranit misilittagarineqalersut malitsigisaannik inatsimmut allannguutissatut siunnersuut akuerivaat, Inatsisartut taamaalillutik immikkut ittumik nukiginnartumik suliassaqartoqartillugu videokkut nalunaarasuartaatitigulluunniit attaveqaatitit aqqutigalugit aalajangiisinnaanngussapput.

Inatsisartut inatsimmik allannguinissaq aalajangiuppaat, tassani Inatsisrtut Siulittaasoqarfianit videokkut nalunaarasuartaatitigulluunniit attaveqaatit aqqutigalugit aalajangiisinnaanngussapput.

Inatsisartut ukiakkut ataatsimiinnerup ulluisa kingulersaanni inatsisissatut siunnersuut suliaripallappaat, Inatsisartut taamaalillutik videokkut nalunaarasuartaatitigulluunniit attaveqaatit aqqutigalugit aalajangiisinnaanngussapput.

Coronap ajornartorsiortitsinerata malitsigisaanik siunnersuusiortoqarsimavoq, coronami atuummat Inatsisartut aalajangiisinnaassuseqartut katersornissaannik unammillernartoqartitsisoqarsimavoq.

Malittarisassat atuuttut malillugit aalajangiinissamut Inatsisartuni ilaasortat ikinnerpaamik affaat Inatsisartut ataatsimiittarfianni najuuttussaapput.

- Naalakkersuisut taamaattumik nalilersimavaat suliassat kinguartinneqarsinnaanngitsut suliarineqarnissaannut (ileqquusumik ataatsimiinnerit avataasigut) Inatsisartut qarasaasiatigut ataatsimiissinnaanermut periarfissaqartariaqartut, Naalakkersuisut siunnersuummut maanna akuerineqartumut nassuiaammi allapput.

Kielsen: Immikkut ittumik pisoqartillugu taamaallaat atorneqartassaaq

Inatsisip allanngortinneqarneratigut Inatsisartut Siulittaasoqarfiat malittarisassanik nutaanik atuisinnaalerpoq. Siulittaasoqarfik aamma tassaavoq, ataatsimiittoqartillugu taasisarnerit qanoq ingerlanneqartarnissaannik aalajangiisartussaq.

Inatsisartut Siulittaasuat Kim Kielsen (S) siunnersuutip suliarineqarneranut atatillugu oqaaseqarpoq. Tassani erseqqissaassutigaa, malittarisassat taamaallaat ajornartoortoqartillugu atorneqartassasoq:

- Inatsit immikkut ittumik pisoqartillugu aatsaat atorneqarsinnaavoq, malittarisassallu qaqugukkut atorneqarsinnaanera eqqumaffigineqartassaaq, Kim Kielsen oqarpoq.

Ilanngullugu oqaatigaa, Inatsisartut suleriaasiat pillugu Partiit ataatsimiigiaqquneqassasut, tassani allannguutit oqaluuserineqassallutik.

Powered by Labrador CMS