Inatsimmik allannguineq: Nioqqutissat akiinik paasissutissiisarneq pitsaanerulersinneqassaaq

Tunisassianik nittarsaassisarneq pillugu inatsisip allanngortinneqarneratigut, atuisut meqqit poortukkallu assigiinngitsunik angissusillit akornanni akinik sanillersuussisinnaanerat qulakkeerneqassaaq

Inuussutissarsiornermut Naalakkersuisoqarfik tunisassianik nittarsaassisarnermut inatsisip allanngutaanik tusarniaalluni nassiusseqqammerpoq, allanngutissatullu siunnersuutip imarai suliniutit nutaat Kalaallit Nunaanni atuisunut iluaqutaasussat.

Innuttaasoq niuerniaraangami nioqqutissat assigiinngitsut akiinik sanillersuussisinnaanermut periarfissaqartassaaq, tassa pisiat qanoq amerlatiginerannut tunngatillugu nioqqutissat sorliit akikinnerunersut takujuminarnerulersillugu.

Kiilumut akigititanik paasissutissiisussaaneq

Tunisassianik nittarsaassisarneq pillugu inatsimmi allannguutissat aappagu Upernaakkut ataatsimiinnermi akuerineqassappata, Naalakkersuisut ”akit assigiissut pillugit paasissutissat, soorlu kiilumut akiusunik ilisimatitsinissamut tunngassuteqartut” pillugit malittarisassaliornissamut periarfissinneqassapput, inatsimmut allannguutissatut siunnersuummut decembarip 27-ata tungaanut tusarniaassutigineqartumut nassuiaatini allassimavoq.

Naalakkersuisoqarfiuttaaq kiffartuussisarnermut pisartagaqarnermullu, inuiaqatigiinni digitaliseerikkani pingaaruteqarneruleriartortut, tassa assigiinngitsorpassuarnik pisartagaqarfiusinnaasut aamma assigiinngitsutigut sullinneqarnissamik kiffartuunneqarnissamillu pisiffiusinnaasut malittarisassaliuullugit aallartissimavaa.

Paasiuminarnerussasoq

- Taamaammat isumaqatigiissutaasartut assigiinngitsut aningaasartuutissartai tamarmiusut paasiuminarnerulersillugit nittarsaanneqartarnerat erseqqissumik malittarisassaqartinneqarnissaa pisariaqarpoq. Taamalu atuisut suliffeqarfiit assigiingitsut neqeroorutaannik assigiinngitsunik sanillersuussisinnaanerat periarfissillugu, Tunisassianik nittarsaassisarneq pillugu inatsimmut allannguutissatut siunnersuummut nassuiaatit aallarniutaanni allassimavoq.

Pisiniarfinni nakkutilliineq

Allannguutissatut siunnersuummi immikkoortup allap Atuisarnermut Unammilleqatigiinnermullu Aqutsisoqarfik periarfississavaa, nittarsaassiffiusartuni pisiniarfiit Tunisassianik nittarsaassisarneq pillugu inatsimmi aalajangersakkanik malinninnersut pillugu misissuisarnissaanut.

Inatsit 2020-mi juulip aallaqqaataani atuutsinneqalissasoq naatsorsuutigineqarpoq.

Powered by Labrador CMS