Inatsimmi amigaataasoq ministerimik ataatsimeeqatigiissutigineqassasoq
Danmarkip inatsit naleqqussartariaqarpaa nunamilu nalunaaruteqartussaatitaanermut inatsimmi amigaataasoq aaqqiiffigalugu, Paneeraq Olsen oqarpoq.
Danmarkimi suniliaqatigiiffiup Tubap inuusuttunik angerlarsimaffinni imigassamik ajornartorsiuteqarfiusumeersunik isumaginnittartup ukiaq manna siusinnerusukkut nalunaarutiginikuuaa, inatsimmi amigaateqartoqartoq.
Suliniaqatigiiffimmit isumaqarput, naalagaaffeqatigiinni pingasuusuni meeqqat atugarliortut pillugit ernummateqaraanni sulianiaqatigiiffiit nalunaaruteqarsinnaasariaqartut. Danmarkimi inatsit naapertorlugu tamanna ullumikkut periarfissaanngilaq.
- Meeqqat katsorsarneqartut Kalaallit Nunaanni angerlarsimaffimminni meeqqanik mikinerusunik ernummateqarnertik oqaluttuarisinnaasariaqarpaat, tassan ataata anaanaluunniit imigassamik atuisarnerat pissutigalugu, Henik Aplle Tubami siulittaasuusoq Sermitsiaq.AG-mut nassuiaasimavoq.
Naalakkersuisup Paneeraq Olsenip (N) allakkatigut akissuteqarnermini erseqqissaassutigaa, ajornartorsiutaasoq Danmarkimiit Kalaallit Nunaannut taamaallaat atuuttoq, taamalu Danmarkip nammineerluni tamanna iluarsiissuteqarfigisariaqaraa:
Allanngortinneqarnissaanik kaammattuisoq
- Inatsimmi "putoq" Tubamit pineqartoq, Danmarkimi kommuniniit Kalaallit Nunaanni kommuninut nalunaaruteqartussaanermut tunngassuteqarpoq. Danmarkimi kiffartuussinissamut inatsimmi kommunit akunnerminni nalunaaruteqartussaatitaanerat pillugu malittarisassat §152-imi aalajangersagaapput. Kiffartuussinissamulli inatsit Kalaallit Nunaannut atuutsinneqanngilaq, taamaammallu kommunit akunnerminni nalunaaruteqartussaatitaanerat Kalaallit Nunaanni atuutsinneqarani, Paneeraq Olsen nassuiaavoq, nangillunilu oqaatigalugu:
- Danmarkimut kaammattuutigerusuppara, inatsisimminnik naleqqussaassasut.
Naalakkersuisup ilisimatitsissutigaa, ajornartorsiutaasoq Danmarkimi isumaginninnermut ministerimut Astrid Kragimut (Soc.) oktobarip qaammataani erseqqissaassutigisimallugu, aamma marluullutik decembarimi ataatsimeeqatigiilerunik pineqartoq oqaluuserineqarniartoq.
Naalakkersuisup ilanngullugu oqaatigaa, meeqqat atugarliortut pillugit nunani pingasuusuni nalunaaruteqartussaanermik pisariaqartitsisoqarnersoq naalakkersuisoqarfianit misissuiffigineqarniartoq.
Astrid Kragip siusinnerusukkut oqaatiginikuuaa, pineqartoq pillugu Paneeraq Olsen oqaloqatigisimallugu.