Inassuteqaat: Nuutoqqami suliniutit tamarmik itigartinneqarlik
Kommuneqarfik Sermersuumit Nuutoqqami suliniut Nuummi tusarniaassutigineqarsimavoq. Suliniutit allat tusarniaassutigalugit aallartinneqarsimapput, ingerlatsivimmilli inassutigineqarpoq, suliniutit tamarmik itigartitsissutigineqassasut, innuttaasunillu peqataatitsilluni suliassamik nutaarluinnarmik aallartitsisoqassasoq.
Orsiiviup Nuunnguani suliniut Kommuneqarfik Sermersuumit upernaaq tusarniaassutigineqarpoq. Unnuisarfeqarlunilu ullaakkorsiortarfilimmik, saqqummersitsisarfilimmik neriniartarfilimmillu 1680 kvadratmeterimik angissusilimmi sanaartorniarnermik suliniut tusarniaassutigineqarluni.
Kommunimi ingerlatsiviup tusarniaanermut akissutit kiisalu pilersaarutit allat pissarsiarineqarsimasut maanna suliarisimalerpai, inerniliunneqarsimavorlu aallaqqaataaniit aallartittoqartariaqartoq.
Ingerlatsivimmit Sanarfinermut Avatangiisinullu Ataatsimiititami politikkerinut inassutigineqarpoq, Orsiiviup Nuunnguani suliniut pilersaarutillu allat marluk pissarsiarineqarsimasut itigartitsissutigineqassasut, sumiiffimmilu pineqartumi susoqassanersoq eqqarsaatigalugu innuttaasunik peqataatitsilluni suliamik aallartitsitsisoqassasoq.
Ingerlatsivimmit erseqqissaassutigineqarpoq, politikkerit namminneq aamma aalajangersinnaagaat, pilersaarutit pingasuusut ilaannik ataatsimik akuersissuteqarnissaq. Pilersaarutit marluusut ilaat akuersissutigineqassagunit tusarniaassutigineqartussaapput, soorlu Orsiiviup Nuunnguani suliniut tusarniaassutigineqarsimasoq assigalugu.
Atsiornerit 612-it
Politikkeri Kuno Fencker allanik pilersaaruteqartut ilagaat. Taassuma suleqatigisartakkani peqatigalugit sumiiffimmi nerisassat kulturilu qitiutillugit sanaartornissaq pilersaarusiorsimavaa. Kommunimili politikkerit ingerlatsiviup inassuteqaatai malissappatikkit, pilersaarut manna piviusunngortinneqarsinnaanngilaq.
Ingerlatsiviup pilersaarutit ititgartitsissutigineqarnissaannik inassuteqarneranut tunngaviuvoq, tusarniaanerup nalaani najukkami innuttaasunit akerliusoqarnerujussua.
Ilaatigut sulinummut akerliuluni atsiornerit 612-it tunniunneqarsimapput kiisalu tusarniaanermut akissutini arlalinni isornartorsiuisoqarsimalluni.
Ingerlatsivimmit tusarniaanermut akissutit aamma atsiornernut katersanut atatillugu oqaaseqaatit qulequttanut sisamanut agguataarneqarsinnaapput:
Immikkoortup taamatut isikkoqarnerata attatiinnarneqarnissaanik kissaat
Immikkoortup biilinik angallaffiunnginnissaanik kissaat
Immikkoortup sukisaarsaartarfittut anersaartorfiunissaanik kissaat
Immikkoortup eriagisassatut nalunaarsorneqarsimanissaanik isumaqarneq
Anbefaler ny proces
Ingerlatsivimmit pilersaarutit ingerlateqqinneqarnissaannut taarsiullugu inassutigineqarpoq, politikkerit innuttaasunik peqataatitsillutik suliassamik nutaarluinnarmik aallartitsissasut aamma immikkoortumut tamakkiisumik pilersaarusiussasut, 2023-p naanerani tusarniaassutigineqartussamik.
Sanarfinermut Avatangiisinullu Ataatsimiititaq sisamanngornermi ualikkut ataatsimiissaaq, tassanilu politikkerit Nuutoqqami sumiiffik oqallisaaqisoq qanoq pineqassanersoq isummerfigissavaat.
Orsiiviup Nuunnguani suliniutigineqartup siornatigut sumiiffimmi akunnittarfiliornissamik suliniut 2019-imi aamma tusarniaassutigineqarpoq. Suliffeqarfiulli Malaysiameersup suliniutini taamaatipallannikuuaa, pilersaarutai taamanikkut akerliuffigineqaqigamik.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...