Skip to main content

Immiorfimmiikkunnaareernermi kingorna: Nissen nutaanik pilersaaruteqarpoq

Inuussutissarsiornermik suliaqartoq Nicolai J. Nissen ukiup aallartinneranit Heca A/S-imi pisortaajunnaarpoq, Heca A/S-imiillu ingerlanneqartut HHE-mit tamarmik ingerlanneqalerlutik. Nicolai Nissenili suliniutinik arlalinnik Nuummi pilersaaruteqarpoq

Nicolai Nissen ukiuni kingullerni pingasuni Heca A/S-imi pisortaavoq, tassani neriniartarfinnik, imerniartarfinnik immiorfimmilu pisortatut inissisimalluni. Ingerlanneqartut HHE-mit 33 procentimik piginneqataaffigineqarput.

Immiorfiup Godthåb Bryghus-ip siunissamut qanoq iliuuseqarfigineqassanersoq assigiinngitsunik isummerfigineqarmat Nicolai Nissen inissisimaffimminit tunuarpoq.

Aalajangerneq pisariaqartoq
- Taamatut aalajangerneq ajornaatsuinnaanngilaq, taamatulli aalajangertoqarnissaa pisariaqarsimavoq, Nicolai J. Nissen oqarpoq. Taanna ukiuni kingullerni 20-ni HHE-mit Carl Juhl aamma Helge Tang suleqatigai.

Immiorfimmi maanna pisortaajunnaarpoq. HHE sooq suleqatigineqarunnaarnersut aamma siunissamut pilersaarutit pillugit Sermitsiaq.AG-mut oqaluttuarai.

- Immiorfimmik nutaamik pilersitsissaanga, taanna Arctic Glacier Brew-imik ateqassaaq. Assigiinngitsunik inerisaassaagut, tassani ilaapput aalakkoornartortaqanngitsunik tunisassiulernissaq, Nicolai Nissen ilisimatitsivoq. 

- Ineriartortitsineq, tuniniaanissamut pilersaarusiornerit aamma suliffeqarfinnik ineriartortitsinerit nukittuffigaakka, oqarpoq. 

- Pisisussanik nassaareerpunga, sulisussamik aamma atorfinititsingajalerpunga, ilisimatitsivoq. Taanna 2017-mi politikkimut iserpoq, tassani kommunimut qinersinermut Siumut tunuliaqutaralugu sassarluni.

Politikki
- Suli politikeriunissat naatsorsuutigaajuk?

- Aap, tamanna naatsorsuutigaara. Uannut qinersisut ikitsuararsuupput, kisianni siuarsaaqataarusuppunga. Naalagaaffeqatigiinneq pillugu Siumut ammanerulersimasoq misigisimavara, tamanna nuannaarutigaara, Nicolai Nissen maanna 43-nik ukioqartoq oqarpoq. 

Juhl aamma Tang
- Carl Juhl aamma Helge Tang ukiorpassuarni suleqatigineranni suut ilikkagaqarfigaagit?

- Suleqatigineri imaannaanngitsorsuuvoq kisianni suleqatigineri ilikkagaqarfigilluinnarpara. Helgep anguniagaqallaqqinneranut nersugassaavoq. Anguniakkani ingerlaannaq angupallakkusuttarpai, piffissaliussaasoq suli nallinngitsoq angoreerusuttarlugit, Nicolai Nissen oqarpoq. Taanna ukiorpassuit matuma siorna bowlingertarfimmik pilersitsinermut suleqataasimavoq. Taanna maannakkut imerniartarfiuvoq, Manhattan.

- Suleqatiginiarlugit imaannaanngitsuupput. Taamaattoq suliffik aamma ikinngutigiinneq immikkoortissinnaasarpaat, tamannalu nersugassaavoq, oqarpoq.

Nicolai Nissen allamik allaffittaaqqammerpoq, Nuummi Fjeldvejimi allaffeqalissalluni. 

Taassumunnga ukioq kingulleq imaannaasimanngilaq, ilaatigut nulianilu avissimallutik. Aamma imigassamut inatsik annertuumik eqquisimavoq.

Stressi
- Suliarpassuaqartarputit ilaatigut immaqa ingasaassisinnaasutut oqaatigineqarsinnaalluni. Tamanna arlaatigut ilinnut sunniuteqartarpa?

- Naamik uannut sunniuteqarlunneq ajorput sulinerpassuakka. Arlaatigut ADHD-eqarlungaluunniit autismeqarsimassaanga. Ukiut qulit matuma siorna stressimik eqqugaavunga, taamani imminut oqarfigaanga timera tusarnaarnerusariaqarlugu, oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER