Imminut toquttartut ikileriarput - kisianni Nunatsinniunngitsoq
Nunatsinni imminut toquttartut agguaqatigiisinnerannit Lesothomit marloriaammik amerlanerupput, tassani nunani millionit sinnerlugit inoqartut akornanni imminut toquttartut amerlanersaagaluarput.
Nunarsuup ilarujussuani imminut toquttartut ukiuni 15-ini kingullerni malunnaatilimmik ikileriarsimasut, Kalaallit Nunaanni ikileriarnatik amerlapput.
Nunarsuarmi imminut toquttartut amerlassusaat 1990-ip aamma 2016-ip akornanni pingajorarterummik appariaateqarsimasut, tuluit atuagassiaanni bmj-imi misissuinerup saqqummiunneqartup nutaap takutippaa.
Nunani allani imminut toquttarnerup qaffasinnerpaaffigisaanut sanilliukkaanni, imminut toquttartut amerlassusaat marloriaat sinnerlugu amerlanerupput. Bmj-ip nunani millionit sinnerlugit inulinni imminut toquttartut amerlassusaasa misissorsimavaat, tassanilu Lesotho qaffasinnerpaalluni inuit 100.000-iugaangata 39,0-it imminut toquttarput. Tassunga tulliuvoq Litauen 31,0-miilluni aamma Rusland 30,6-miilluni.
Kalaallit Nunaanni Politiinit kisitsisit qiviaraanni taamatullu aamma naatsorsuusiarigaanni, Kalaallit Nunaanni piffissami 2013-imit 2017-imut agguaqatigiisillugu kisitsit 82-imiippoq.
Nunarsuaq tamakkerlugu sanilliukkaanni inuit 100.000-iugaangata 11,2-t imminut toquttarput.
Nunarsuaq tamakkerlugu imminut toquttartut ikileriaraluartut, imminut toquttarneq siusippallaamik toqusarnermut pissutaasut annersaasa ilagigaat allaaserisamik allaaserinnittut oqaatigaat. Inerniliussaq taanna Kalaallit Nunaanni annertuumik atuuppoq.
