Imminut toquttartut amerlalluinnarmata pinaveersaartitserusuttut: - Politikkikkut iliuuseqartoqarnissaa pisariaqarluinnarpoq
Imminut toqunneq inummut taamak toqqaasumut alianarluinnarpoq. Ilaquttat ikinngutillu aliasunnermik qaangeruminaattumik eqqugaasarput. Tamatumalu saniatigut inuiaqatigiinni taamak innuttakitsigisuni annaasaasarpoq annertooq. Tamanna aallaavigalugu inuit sisamat suleqatigiillutik pinaveersaartitsiniarnermik aallartitsipput.
Sapaammi aaqqissuusinermi assit, assip nalaani tikkuut toorlugu qimerloorsinnaavatit.
Imminut toqunnissamik pinaveersaartitsineq pillugu periusissiap nutaap, sapaammi nunarsuaq tamakkerlugu imminut toquttarnerup pinaveersaartinneqarnissaanik ullorititaasumi Naalakkersuisut saqqummiuteqqammigaata saniatigut, inuit sisamat nunatsinneersut kajumissutsiminnik suliniummik "45"-mik taasamik aallartitsipput.
Suliniut "45"-mik taaguuteqartinneqarneranut pissutaavoq agguaqatigiissillugu ukiumut innuttaasut 45-it imminut toqunnermikkut qimaguttarmata.
- Ukiut tamaasa inuit 45-it missaannik amerlassusillit nunatsinni imminnut toquttarput. Tamatuma nunarsuarmi rekordiliisippaatigut imminut toqussimasut amerlassusaatigut. Imminut toquttoqartarnera inuiaqatigiinni ajornartorsiutit annersaasa ilagaat, ajoraluartumilli taamaattoqarnera akunnitsinni sungiutiinnartoorsimavarput. Inuit ataasiakkaat taakkulu ilaqutaasa nalaataattut alianartutut isigilersimavarput, uffa massa inuiaqatigiit nappaataattut isigisassaasoq.
- Inuiaqatigiittut ingerlalluarnissarput tamakkiisumik sulissutigisinnaanngilarput, inoqativut taamak amerlatigisut inuuneq artulersimappassuk, inuit sisamat taakku suliniutertik pillugu nassuiaamminni erseqqissaapput, suliniullu sapaammi timitalimmik takussutissinneqarpoq qulliit Tuapannguani Blok T-ip iigarsuani kujallermi ikinneqarmata.
Suliniutit aallartikkaluaannakkat naammanngillat
Suliniummik aallartitsisut taakku sisamat maluginninniaqqusipput, ukiut ingerlanerini ajunngitsumik isumaqarluni suliniutit assigiinngitsut aallartinneqartaraluartut anguniagarli malunnaatilimmik angunagulu unitseqqinneqaannartartut amerlammata.
Taakku isumaqarput inuiaqatigiinni oqaloqatigiinnissaq amigaataasoq, pingaartumik inuunermi nalaatassat, tarnikkut peqqissuseq aammalu nalaataqarnermi akiuussinnaassuseqarneq pillugit oqallittoqarnerusariaqartoq.
Suliniuteqartut taakku innersuussutigivaat siusinnerusukkut imminut toquttarnermut pinaveersaartitsinissaq pillugu periusissiaq 2019-mili naareeraluartoq, aatsaat 2023-mi periusissiamik nutaamik naalakkersuinikkut piareersitsisoqartoq:
- Imminut toquttoqartarnera pillugu politikkikkut annertuumik iliuuseqartoqartariaqarpoq; suliffissaqarneq, inussaqarneq, peqqissuseq, aningaasatigut nikingasoqarnerujussua, ilinniartitaaneq, najugaqariaaseq allarpassuillu qaqiligassaapput iluamik imminut toquttarneq pinaveersimatinneqassappat.
Suliniut "45"-ip Facebookimi quppernera:
