Imminut toquttarnerup akiornissaanut suliniutit nalilersorneqartut
Imminut toquttarnerup pinngitsoortinnissaanut suliniutitut 2019-ip tungaanut pilersaaruteqarsimavoq. Suliniutitut pilersaarutissap tulliata suliarinnginnerani, suliniutaasimasumi aallartinneqarsimasut maanna nalilersorneqaqqaarallarput.
Imminut toquttarnerup akiornissaanut suliniutitut pilersaarut 2019-ip tungaanoortoq, suliaqarfiit akimorlugit suleqatigiinnissamik aallutaqartitsisimasoq maanna qaangiussimalerpoq.
Isumaginninnermut naalakkersuisoq Martha Abelsen (S) erseqqissaavoq ajornartorsiut suli annertummat, suliassaq unitsiinnarneqanngitsoq. Suliniutit aallartinneqareersut maanna nalilersorneqarput.
- Suliniutit aallartissimalersut maanna nalilersorpagut, nalilersorlugulu isumaginnittoqarfiup tamakkiisup ataani imaluunniit inuiaqatigiinni ajornartorsiutip annertuupilussuunera pissutigalugu immikkoortutut suliniutitut pilersaarusiorfigineqassanersoq, Martha Abelsen Sermitsiaq.AG-mut oqarpoq.
Kisitsisit suli ajorput
Kalaallit Nunaanni imminut toquttartut ukiumut amerlassusaat 1070-ikkunniilli nikeriarsimanngillat. Kalaallit Nunaanni innuttaasunik misissuinerup 2019-imi tamanna ersersippaa. 2017-imi imminut toqussimasut katillugit 41-pput.
Martha Abelsenip erseqqissarpaa suliassaq pingaarnersiuinermi salliusunut ilaatinneqartoq.
- Suliassaq sutigut tamatigut salliutinneqarpoq, nalilersuereeruttali aatsaat qanoq pilersaaruteqarnerluta nalunaarusuppugut. Suliaq iperanngilarput, oqarpoq.
Suliniutit aallartinneqareersut ilaat tassaavoq Tusaannga, sianerluni siunnersortiffiusartoq januarimi 2019-imi ammarneqartoq. Tusaannga innuttaasunut ajornartorsiutitik pillugit oqaloqateqarusuttunut neqeroorutaavoq.
Sianerfissaq tassaavoq 801180 ullullu tamaasa nalunaaqutaq 16.00-22.00 sianerfigineqarsinnaalluni.