Imminut toquttarneq pinaveersaartinniarlugu suliniut nersualaarneqarlunilu taperserneqarpoq

Suliniummi Inuuneruna Iggoraarsummi suleqataasut peqqissutsimut naalakkersuisumit Steen Lyngemit Atassummeersumit ataasinngormat nersualaarneqarput. Taakku imminut toquttarnermut pinaveersaartitsillutik suliaqarput.

Suliniummut 5.000 koruuninik tapiisoqarpoq.

Namminneq piumassutsiminnik suliniummi suliaqartuupput, Facebookikkut aamma qupperneqarput.

- Nuannaarlungalu tulluussutigisarpara inuit namminneq piumassuseqarnertik tunngavigalugu sammisamik paquminartinneqarluartumik imminnut toquttarnertut ittumik qitiutitsinermik pilersitsinermut peqataagaangata. Pinaveersaartitsineq iluatsilluassappat, inuit namminneq pisortallu suliniutini suleqatigiilluartariaqarput. Uanga assut soqutiginnillunga aallartinneqaqqammersoq malinnaaffigaara Facebookimi suliniut Inuuneruna Iggoraarsuk, Peqqissutsimut Attaveqarnermullu Naalakkersuisoq Steen Lynge oqarpoq.

Pinaveersartitsineq
Nunarsuaq tamakkerlugu imminut toquttarnermik pinaveersaartitsinermut ulloritinneqartoq septembarip qulingat atatillugu nersualaarinnittoqarpoq.

Ulloq nunatsinni assigiinngitsunik aaqqissuussisoqarneratigut malunnartinneqarniarpoq, Inuuneruna Iggoraarsuk aamma suliaqassaaq ullormi tassani.

Ilaatigut nunarsuaq tamakkerlugu imminut toquttarnermik pinaveersaartitsiniarluni iliuusissat pillugit oqallitsitsineq Nunatta Atuagaateqarfiani nal. 19.00 – 21.30 ingerlanneqarniarpoq, tassani Peqqissutsimut Attaveqarnermullu Naalakkersuisoqarfik peqataatitaqassalluni.