Imminut toqunnissamut pinaveersaartitsineq: Periaaseq nutaaq najukkami pigiliunneqassaaq

Nunami maani ajornartorsiutit annersaasa ilaat - imminut toquttarnerpassuit – Nunatsinni Issittumilu pissutsit aallaavigalugit namminerisaminik pinaveersaartitsinermut periaaseqarfiusariaqarpoq. Suliaq tamanna maanna aallarnisarneqaleruttorpoq, tamatumanilu inuusuttut utoqqaallu akuutinneqassallutik

Nunatsinni imminut toquttartut ikinnerulersinniarnerat suli utaqqineqarallarpoq.

Ikittunnguit eqqaasanngikkaanni ukiup ingerlanerani sapaatip akunneri tamaasa imminut toquttoqartarpoq. Politiit kisitsisaataat naapertorlugit 2019-imi imminut toquttut 45-uupput.

Kisitsisit taama amerlatiginerisa aamma kinguneranik, kikkut tamangajammik namminneq piumassutsiminnik inuunerminnik kipititsisimasunik ilisimasaqartarput. Aamma amerlanersatta sakkortuumik annaasaqarnerup kinguneranik sakkortuumik aliasuuteqarluta misigereersimavarput.

Ikiorneqarnissamik pisariaqartitsivit?

Tusaannga Ikiorneqarnissamik oqaloqateqarnissamilluunniit pisariaqartitsiguit, taava Tusaannga attavigiuk, oqarasuaammut 801180-imut imaluunniit 1899-imut SMS-erlutit.

Namminersorlutik Oqartussat imminut toqunnissamik pinaveersimatitsiniarlutik suliniutaat siorna qaangiuppoq. Aallaqqaammut periaatsimik nutaamik suliaqartoqannginnissaa eqqarsaataagaluarpoq, tamatumunngami taarsiullugu imminut toqunnissamut pinaveersaartitsineq innuttaasut peqqissuunissaannut suliniummut Inuuneritta III-mut ilanngunneqarnissaa eqqarsaataagami. Tamakku saniatigut suliniutit soorlu Killiliisa aamma angajoqqaat meeqqaminnik sumiginnaasarnerannut nuna tamakkerlugu iliuusissatut pilersaarut, atuupput, tamarmillu imminut toqunnissamik eqqarsartut ikilisinneqarnissaannik siunnerfeqarlutik. Soorlu tamatumani pineqarlutik meeqqat angerlarsimaffiini naapertuilluanngitsuliornerit, nakuusernerit aamma imigassamik atornerluinerit.

Taamaakkaluartorli imminut toquttarnermut pinaveersaartitsinissamut periaatsimik aalajangersimasumik suliaqartoqassasoq, maanna siunniunneqarpoq. Suliniummik aqutsisoq peqqissutsimullu tunngasunik siunnersorti Tina Evaldsen isumaginninnermut aqutsisoqarfimmeersoq AG-mut taama ilisimatitsivoq.

Taassuma nassuiaatigaa, aalajangiunneqarsimammat imminut toquttarnermut pinaveersaartitsinermut atatillugu namminerisamik periaaseqarneq ersarinnerulersinneqassasoq. Tamatumalu peqatigisaanik ukiuni tulliuttuni ataavartumik ineriartortitsisoqassasoq siunnerfeqartumillu suliniuteqartoqassasoq.

Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq:

Powered by Labrador CMS