Imminut toqunnissamik siorasaarutit Facebookimi takussaasalersut
Inuit imminut toqunnissamik eqqarsaateqartut ikiorneqarnissamik assigiinngitsutigut nilliasinnaapput. Periutsit nutaajunerusut ilaat tassaavoq Facebook. Tamanna pitsaasumik kinguneqarsinnaasoq, tarnip pissusaanik immikkut ilisimasalik oqarpoq.
Facebook Kalaallit Nunaanni immikkuullarilluinnartumik tiguaariaaseqarpoq. Tamanna kikkut tamarmik annerusumik minnerusumilluunniit nalunngilaat. Allaat atuisut ilisarnaataannik pigisaqanngitsut.Aviisi AG taama allappoq.
Nunami innuttaasut siamaseqalutik najugaqarfigisaannik atortuuvoq immikkullarilluinnartoq. Inuppassuarnit nittartagaq inuit attaveqaqatigiittarfiat illoqarfimmi nunaqarfimmiluunniit qimassimasani attaveqarfigisat allanngutsaaliornissaannut atorneqartarpoq.
Facebookimi qanoq pissusilersornissaq ukiualuit matuma siorna allaaserineqartorujussuuvoq. Suut allaaserineqarsinnaanersut suullu allaaserineqarsinnaannginnersut eqqartorneqarluni. Nerisassanik, naalungiarsunnik timersornermillu assilisarpassuit malunnartumik naammagisimaarneqanngillat. Tamakkuali tammakarsimanngillat.
Pissuserineqaleriartortoq alla takkukkiartuaalersimavoq. Imminut toqunnissamik sioorasaarinerit. Tamakkualu tusaanngitsuusaarneqartassanngitsut, tarnip pissusiinik immikkut ilisimasalik, Jonna Ketwa, oqarpoq.
- Politiinut, peqqinnissaqarfimmut kommunimulluunniit sianertoqarsinnaavoq. Taakkua imminut toqunnissamik aarlerinartorsiortunik oqaloqatiginninnernik tigusisarniarlutik isumaqatigiissuteqarsimapput. Aamma oqarasuaatikkut siunnersuisarfik Tusaannga innersuussutigineqarsinnaavoq, tassanilu suliamut ilinniarsimasut pisariaqartitsisunik tamanik oqaloqateqarnissamut piareersimasarput, aviisimut AG-mut oqarpoq.
- Imminut toqunnissamik sioorasaarisoqaraangat, tamakkua pimooruttassavavut. Innuttaasutut nalunaarutiginninnissamut pisussaaffeqarpugut, erseqqissaavoq.
Misissuinernit takutinneqarpoq, imminut toquttut imminut toqunnissaq sivisuumik eqqarsaatigisarsimagaat. Anniaammik angisuumik misigisaqartarput amerlanertigullu ikiortissarsiortarsimagaluarlutik. Tamakkua ilaat arlallit alianartumik toqqagaqannginnerminni imminut toqunnissamik eqqartuisimasarput.
Facebook inuunermik annaassisinnaavoq
- Imminut toqoriarnerit amerlanertigut ikioqqulluni nillianerusarput, pimooruttariaqakkavut. Taamaattumik Tusaanngap pilersinneqarsimanera aamma isumaginninnikkut oqartussat, peqqinnissaqarfiup politiillu imminut toqunnissamik aarlerinartorsiortut oqaloqatigisarnissaannut suleqatigiinnerat nuannaarutigaara, Jonna Ketwa oqarpoq.
Tassami imminut toqunnissamik aarlerinartorsiortut inuunerminni atukkamik isumagisinnaanissaannut ikiorneqarneqarnissamik pisariaqartitsisarput.
Facebookimi imminut toqunnissamik siorasaarisut qanoq qisuariarfigineqarsinnaasut Kalaallit Nunaannilu Politiit tamakkununnga qanoq qisuariartarnersut pillugit aviisimi AG-mi atuarnerusinnaavutit. Aviisi AG uani ataani pissarsiarisinnaavat: