Politiit Ukiumut kisitsisaataat 2017
Imminut toqunnissamik siorasaarinerit amerleriartut
Ukiuni kingullerni marlunni imminut toqunnissamik amerleriangaatsiarsimapput, ukiormi kingulleq imminut toqunnissamik suliat 660-it missaanniik 832-inut amerleriaateqarsimapput. Ajusaarnaqaaq, Kalaallit Nunaanni politimesteri erseqqissaavoq.
- Nalaatarput assut ajusaarnaqaaq, politimester Bjørn Tegner Bay Sermitsiaq.AG-mut oqarpoq.
Qaffariaateqangaatsiarneq
Imminut toqunnissamik siorasaarinermik suliat politiit kisitsisaataanni amerliartuinnavissimasut, taassuma maluginiarsimavaa. Kisitsillu sooq taama qaffariaateqangaatsiarsimanera, taassuma nassuiaatissaqartinngilaa. Nunarsuatsinni sumiiffinni allani taama annertutigisumik imminut toqunnissamik siorasaarisoqartarnersoq, Bjørn Tegner Bayip ilisimanngilaa.
- Imminut toqunnissamik siorasaarisoqartillugu soorunami qanigisat eqqorneqartarput. Imminornissamillu siorasaarinermik nalunaarutiginnittoqartillugu politiit peqqinnissaqarfiullu sulisut arlallit atortariaqartarpaat, politimester oqaluttuarpoq.
Politiit ornigunnerat
Naliginnaasumik politiit arlallit orniguttariaqartarput, illoqarfiullu ilaata assersorneqarnissaa amerlasuutigut pisariaqartarpoq, taamaasiornikkummi imminornissamik siorasaarisoq ajoqusernissaa pinaveersaartinneqartarpoq, pineqartorlu peqqinnissaqarfimmut ingerlateqqinneqartarluni.
- Taamatut suliaqarnerit inuiaqatigiinnut aningaasartuutaasarput. Taamaakkaluartoq politiit peqqinnissaqarfimmilu sulisut isumannaallisarneqarnissaaq eqqarsaatigisariaqarpagut, Bjørn Tegner Bay nassuiaavoq.
Saqqummertariaqartut
Ajornartorsiutip oqallisigineqarnissaa politimesterip kissaatigaa, taamaasiornikkummi imminut toqunnissamik siorasaarisarnerit pinaveersaartinneqassapput, inuiaqatigiimmi aningaasartuutingaatsiarluguli qanigisaasut aamma aliasuutigisarpaat.
- Imminut toqunnissamik siorasaarinerit amerlasuumik aningaasartuutaasarmata oqalligisineqarnissaa pisariaqarmat qularutissaanngilaq, Bjørn Tegner Bay erseqqissaavoq.