Imminut toqunnissamik eqqarsaateqartarsimasoq: Tusarnaartigut oqaluuserinata
Tallimanngorneq 10. september tassaavoq nunat tamalaat imminut toquttarneq pillugu ullorititaat. Nunatsinni sumiiffinni arlalinni ulloq malunnartinniarlugu sammisaqartitsisoqarpoq, MIO-llu kaammattuutigaa suliniutit inummut pineqartumut tulluarsagaasassasut.
Ullumikkut tassaavoq nunat tamalaat imminut toquttarneq pillugu pinaveersaartitsinermut ulloritittagaat. Ajornartorsiut nunatsinni innuttaasunik arlalinnik eqquisartoq, taamatullu suliniarfigineqartuartariaqartoq.
- Nunatsinni imminoriaraluarsimasut siorna 120-upput. Tamangajatta ilisimasaqarpugut taamatut misigisaqarsimasumik, tamannalu tamatsinnut sunniuteqarujussuartarpoq. Taamaammat amerlasuutigut aamma apeqqutigisariaqarsimavarput qanoq iliorsinnaanerluta, MIO tusagassiorfinnut nalunaaruteqarluni allappoq.
MIO-p inuk imminut toqunnissamik misiliisimasoq oqaloqatigisimavaa. Taannalu oqaluttuarpoq imminut toqunnissamut eqqarsaateqarnermi pissutaasut assigiinngitsorujussuusarmata, pinaveersaartitsinermi suliniutit taamatulli assigiinngiiaartigisariaqartut.
Peqqutit arlallit
Innuttaasut Peqqissusianik Ilisimatusarfiup 2021-mi saqqummersitaani “Kalaallit Nunaanni 15-iniit 34-nik ukiullit akornanni eqqarsartaatsikkut peqqissuseq aamma peqqissuseq”-mi atuarneqarsinnaavoq pissutsit pingasut meeraanermi atugarisimagaanni imminut toqunnissamut eqqarsaateqarnissaq qaninnerusartoq. Tassalu imigassamik ajornartorsiuteqarneq, persuttaaneq aamma meeraanermi kinguaassiuutitigut atornerlunneqarsimaneq.
Namminersorlutik Oqartussat nittartakkamini ilisimatitsivoq ullormi sammisassaqartitsiniarluni aningaasanik qinnuteqarnissamut periarfissaqartitsisimallutik.
Illoqarfiit 11 nunaqarfiillu 13 sumiiffimminni sammisaqartitsinissaminut aningaasanik tapiiffigineqarput.
Pineqartut peqataatissigit
MIO tusagassiorfinnut nalunaarutimini imminut toqunnissamik misiliisimasup isummersuutai issuarpai. Ilaatigut erseqqissarneqarpoq pineqartut suliniutini peqataatinneqartassasut, taamatullu suliniutit assigiinngiiaartussaasariaqartut.
- Tusarnaarniartigut oqaluuseriinnarnata. Iliuusissanik pilersaarusiulerussi ilanngutsittarniartigut. Uagut suna pineqartoq ilisimaqqissaarparput, taamaattumik tusarnaarniartigut, isumaqatissarsiuinnarasi oqallitsitsiinnarasi tusarnaaqqaarnataluunniit. Kiisalu naggataatigut: Pilluta pilluta ikiortissarsiornialeraangatta, taava upperiniartigut, atukkatsinnik ilungersorluta atugaqarnerput uppernarsaaqqaartariaqanngilaq. Amerlaqaagummi aatsaat ikiortittut, imminoriaraluarsimagaangatta.