misileraalluni aalisarneq

Immikkut pisassiineq umiatsiaararsortunut navianarpallaarpoq

Qeqertarsuup eqqaani umiatsiaararsorluni qaleralinniarnissamik aalajangerneq inuunermik ulorianartorsiortitsinermik kinguneqarsinnaasoq Siumut sinnerlugu Qaasuitsup kommunalbestyrelseani ilaasortaq isumaqarpoq

Misileraalluni qaleralinniarnissamik aalajangerneq inuunermik ulorianartorsiortitsisinnaasoq, politikkerit ilaata oqaatigaa

Qeqertarsuup Aasiaallu akornanni umiatsiaararsortut misileraammik qaleralinniartinnissaannik aalisarnermut naalakkersuisoq Karl Lyberth Siumumeersoq aalajangernini pillugu parteeqamminit isornartorsiorneqarpoq. Qaasuitsup Kommuniani kommunalbestyrelsemi Siumut sinnerlugu ilaasortaq Palle Jeremiassen isumaqarpoq misileraalluni aalisarfissatut toqqarneqartoq umiatsiaararsortunut navianarpallaartoq.

Atuaruk: Septembarimit atuutilersussamik qaleralittassiisoqarpoq

Qeqertarsuup tunuani aalisartut immikkut 700 tonsinik qaleralinniarsinnaalersut Naalakkersuisut nalunaarutigaat. Tamannali aatsaat pisinnaavoq Qeqertarsuup Aasiaallu akornanni imartami misileraalluni qaleralinniarnermi. Misileraalluni qaleralinniartoqartussanngorpoq Qeqertarsuup tunuani umiatsiaararsortut qaleralittassatik aggusti aallartiinnartoq tamakkermatigit.

- Aalisarfissatut imartaq innersuunneqartoq ukiup taamaasinerani kiap umiatsiaararsortup angallavigisinnaangamiuk, allaat inuunermik ulorianartorsiortitsilluni aalisarneq aatsaat ingerlanneqarsinnaavoq, Palle Jeremiassen oqarpoq.

Taanna isumaqarpoq misileraalluni aalisartitsinissamik aalajangerneq ilumoorussaanngitsoq Naalakkersuisullu kaammattorpai qineqqusaarnermi atuisut peqataatinnissaannik neriorsuutit timitaleqqullugit.

- Massakkut aalisarfiusut sumiiffiit avataanni misileraalluni aalisartoqassappat misileraaffissanik aalisartut kattuffii suleqatigalugit aaqqiisoqartariaqarpoq umiatsiaararsortunut orninneqarsinnaasumik. Ilulissammi eqqaani Qeqertarsuullu tunuani massakkut aalisarfiunngitsunik misileraaffigineqarsinnaasunik imartanik ulikkaarpoq, Palle Jeremiassen oqarpoq.

Powered by Labrador CMS