Skip to main content

Immikkut ilisimasalik: USA sakkutuunik amerlanernik Kalaallit Nunaannut aallartitsisariaqanngilaq

USA-p Kalaallit Nunaanni sakkutooqarnikkut ingerlataanut sinaakkutissanik ersarissunik pilersitsisoqartariaqarpoq NATO-lu ingalassimatinneqassaaq, Illersornissaq pillugu Ilisimatusarfimmeersoq Camilla T. N. Sørensen oqarpoq

Pissaanilissuit Issittumi unammilleqatigiinneruleriartuinnarnerat nunarsuup immikkoortortaani sakkussanik peqarneruniunnermik nutaamik pilersitsisoqarnissaanut aarlerinaammik imaqarpoq. Taama DIIS-imi (Dansk Institut for Internationale Studier) ilisimatusartuuneq Mikkel Runge Olesen aamma Illersornissaq pillugu Ilisimatusarfimmi lektori Camilla T. N. Sørensen naliliipput.

Taakkua pissaanilissuit pissusilersornerannik, Issittumi naalagaaffinnut mikisunut imaaliallaannaq ajornartorsiutinngorsinnaasumik, Finlandip, Norgep Islandillu qanoq iliuuseqarfiginninnerannik nalilersuinermik peqatigiillutik suliaqaqqammersimapput. Taakkua nunani avannarlerni nunani sanilerisani Naalagaaffeqatigiit ilinniarfigisinnaasaannik misilittagaqarnersoq misissorsimavaat.

Tamatumannga immikkoortunik arfinilinnik maanna kunngeqarfiup Issittumut periusissiaata nutaap suliarineqartussanngornerani isumaliutigineqartariaqartunik saqqummiussipput.

DIIS nalunaarusiamini Norgemi, Finlandimi Islandimilu misilittakkat aallaavigalugit inassuteqarpoq, Kunngeqarfiup Issittumut periusissiaani immikkoortut arfinillit tulliuttuni taaneqartut isummerfigineqassasut:

Inassuteqaatit ilaat USA-p NATO-llu Kunngeqarfiup nunataani sumi qaqugukkullu sakkutooqarnikkut ingerlataqarsinnaanerinut Naalagaaffeqatigiinnerup ersarissunik najoqqutassiortariaqarneranik nipeqarpoq. Tassani ingerlatat suut pineqarnerat aamma ilanngunneqartariaqarpoq.

Russit qisuariarnissaannik pinaveersimatitsineq

Camilla T. N. Sørensenip najoqqutassiat taakkua qanoq isikkoqarsinnaanerat DIIS-imi sisamanngornermi ataatsimiittoqarnerani itisilerpai.

- Naliliinera naapertorlugu NATO Kalaallit Nunaata avataaniitilluinnarneqartariaqarpoq, Ruslandip NATO-p Issittumi ingerlataanut apeqqusiisorujussuarmik isiginninnera innersuussutigalugu oqarpoq. Taamaammat NATO-p najuunnera russit akissuteqarnissaannik pilersitsissutaararsinnaavoq.

Kisianni USA-p najuunnera aamma killilersimaarneqartariaqarpoq.

- USA Pituffimmi sakkutooqarfimmi ullumikkut najuunnermi saniatigut sakkutooqarnikkut ataavartumik najuunerminik annertusaasariaqanngilaq, tamanna sakkutooqarnikkut najummassimanartorsiornernik aamma annerulersitsisinnaammat.

Tamatumali peqatigisaanik isumaqarpoq, USA-p aaqqiagiinnginnermut pisinnaasumut qisuariarsinnaanermik kissaataa akuersaarneqartariaqartoq, pisumi tamatumani sakkutuunik sakkutooqarnikkullu atortunik Kalaallit Nunaannut aallartitsisinnaanermik periarfissiinikkut, Kangerlussuaq aqqutigalugu ullumikkut pisinnaareersutut.

Naalagaaffeqatigiinneq sakkutooqarnikkut piginnaasanik annertusaasariaqarpoq

Kisianni USA-p najuunnerminik annertusaanissaata pinaveersaartinnissaa iluatsissappat, taava Naalagaaffeqatigiinnerup Kalaallit Nunaanni eqqaanilu sakkutooqarnikkut suliassanik ullumikkornit annertunerusumik nammineerluni naammassinnissinnaanerunissaa pisariaqassaaq.

Taamaattumi isumaliutigineqartariaqartut ilaat alla tasssaavoq, kunngeqarfiup Issittumi sakkutooqarnikkut piginnaasani annertusartariaqarai, Rusland sakkutooqarnikkut ingerlataminik annertusaassagaluarpat aaqqiagiinnginnerup immikkoortui aallarnisaataasut nammineerluni isumagineqarsinnaaqqullugit. Iluamik oqaatigalugu tamatumani pineqarpoq, piffissamik Amerikamiunut saaffiginnittariaqalernermik kinguartitsisinnaaneq, tamatumami kingorna pisut nammineerluni aqunneqarsinnaajunnaassammata.

Ministeriuneq Mette Frederiksen (Soc) qanittukkut ilimasaarivoq, Issittumi Illersornissaqarfimmut 1,5 milliarder koruunit immikkut atorneqassasut, tamannalu aningaasartuutissatut missingersuutinik pingasoriaammik annertunerulersitsissalluni. Aningaasat immikkut ittut taakkua ilaatigut alaatsinaannerup nukittorsarneqarneranut atorneqassapput.

Nalunaarusiaq 'Intensifying Great Power Politics in the Arctic - Points of Consideration by the Kingdom of Denmark' DIIS-imit saqqummersinneqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER