Immikkut ilisimasalik: Mittarfiit nutaat takorluuisinnaanermut immikkut piumaffiginnippoq

Takorluuisinnaaneq ilisimasaqarnermit pingaarnerusoq, Albert Einstein oqarsimavoq. Taama oqarneq siunissaq pillugu ilisimatusartup, Uffe Paludanip, Aningasaqarnermut Siunnersuisoqatigiit mittarfinnik sanaartornermi periarfissat nutaat pillugit ataatsimiisitsimmata, ataatsimeeqataasunut 140-sunut tusartillugu ilalerpaa.

Uffe Paludan, siunissaq pillugu ilisimatusartutuunngitsoq, kisialli siunissaq pillugu eqqarsartutut taaneqarusunnerusoq, nutaanik pingasunik mittarfittaarnermi kalaallit inuiaqatigiit qanoq ineriartussanersut pillugit paasisaqarniaraanni, innuttaasut amerlassusaanik naatsorsuineq kisimi naammanngitsoq erseqqissaatigaa.

Kisermaassisoq tatineqarpoq

Siunissaq eqqoriarsinnaajumallugu takorluuisinnaasoqartariaqarpoq, Uffe Paludanillu kalaallit innuttaasut siunissami qanorikkumaarnersut arlalitsigut assersuutissaqartippaa.

- Savalimmiuni silaannakkut angallannerup kisermaannera attatiinnarneqarsinnaasimanngilaq, Uffe Paludan oqarpoq tikkuarlugu Air Greenlandip unammillertaagaluartut allat tamaasa maannamut peersissinnaasimagai nunap iluani angallannerup akiisa qaffasinneruneratigut.

Naatsorsoruminaatsippaa siunissami Nuummiit Københavnimut toqqaannartumik angalatitsisarnissaq ullut tamaasa pisarsinnaanersoq, unammillersinnaanersorluunniit.

Air Greenland ataannassava?

- Imaassinnaasoq Keflavik aqqusaarlugu angalasalertugut, tassuunami timmisartortut ilaasussaqarnerupput, Danmarkimullu aallarfissat amerlanerullutik, Uffe Paludan oqarpoq. Qinngasaaraluni Air Greenlandip siunissami ataannarnissaa apeqquserpaa, tikkuarlugulu amerikamiut timmisartuutileqatigiiffiat annerpaasimasoq PanAm, Ronald Reaganip ´90-ikkunni amerikami silaannakkut angallannerup unammillerfinngortinnerata kingorna atorunnaartariaqarsimasoq.

Uffe Paludan siunissami inuiaqatigiit ineriartornerannut pissutaasinnaasut arlaqartut taakkartorpai. Inuiaqatigiit ineriartornerat piniartuunermit, nunalerinermit, tunisassiornermit kiisalu ilisimasanik tunineqartartunit ineriartorsimapput maannalu allarluinnarmik inissisimalluni: inuiaqatigiit sinnattullit, tassa nioqqutissiornermik ingerlataqanngitsut, atuinermilli annertuumik ingerlatsisut.

Silap pissusiata allanngoriartornera

Silap pissusiatalu allanngoriartornera aamma sunniisinnaavoq.

- Silaannakkut angallanneq Northwestpassagekkoortillugu annertusissappat, taava Nuup timmisartoqarfiani angallanneq annertunerulissaaq, sulisut ilaasullu taarseraannerulissagamik, Uffe Paludan, ukiuni kingullerni qulini Københavns Lufthavnemi siunnersuisuusoq oqarpoq.

Siunissaq nalunartoq

- Siunissaq naluarput qanoq ikkumaarnersoq, siunissamilli uagut pilersitseqataavugut. Periarfissat aarlerinarsinnaasullu nalunngilagut, Uffe Paludan oqalugiarnermini naggataarutaasumik oqarpoq. Taassuma siunissaq pillugu oqalugiarnermini quujanartunngortitsilluni siunissaq oqalugiutigaa.

Powered by Labrador CMS