Immikkut ilisimasalik: Maaji Nuann timersornermik aallussinerusunit soqutigineqarnerusarpoq
Illoqarfiit arlallit meeqqanut, inuusuttunut inersimasunullu maajimi timersornikkut sammisassaqartitsinerusarput. Aaqqissuussat taama ittut peqqinnerulernissamut aallaaviusinnaagaluartut, taamaattoq inunnut nukissaqarnerusunut kajungilersitsisartut, studieadjunkt isumaqarpoq.
Arpattoqassaaq, yoga misilinneqarsinnaavoq, qaqqamut pisuttuarnerit periarfissaapput timersortarfiillu sammisassaqartitsillutik ammassapput. Maaji Nuann assigiinngitsunik aaqqissuussaqarfiusarpoq, timersornermik misileerusuttut assigiinngitsunik periarfissinneqarlutik. Periarfissanilli misiliisut taakkuusarput ulluinnarni nukissaqarnerit.
Ilinniarfissuarmi timersorneq silamilu aalaneq pillugu studieadjunkt, Victoria Black taama isumaqarpoq.
- Takorloorsinnaavara Maaji Nuann iluatsilluartutut taaneqarsinnaasoq, timersoqatigiit sammisassaasinnaasunik nittarsaassisinnaammata. Najukkami periarfissanut nittarsaassinissamut periarfissatsialaavoq, Ilinniarfissuami timersorneq aamma silami aalaneq pillugu studieadjunkt, Victoria Black Sermitsiaq.AG-mut oqarpoq.
Maaji Nuanniim periarfissat timersornerulernermik kinguneqarsinnaalluarput. Tamanna Timersoqatigiit kattuffiata anguniagaanut, tassa nunarput 2030-mi aalanerpaanik innuttaqassasoq, naleqqulluinnarpoq.
Avatangiisit toqqissisimanartut ileqqunik allanngortitsilersinnaapput
Unammillernartorli tassaasinnaavoq timersornermik aallussereersunut Maaji Nuannimi periarfissat kajungernarnerusinnaasarnerat.
- Timersornermik aallussereersut aaqqissuussanukarnerusarneri takorloorsinnaavara. Innuttaasut ulluinnarni nukissaqarnerusut periarfissagissaarnerusullu aaqqissuussanut nutaanut ornigunnerusarput, periarfissalunnerusulli ornigunnginnerusarlutik, Victoria Black oqarpoq.
Innuttaasut timersornerulernissaat anguniarlugu suliniutinik assigiinngitsunik suliaqartoqarsinnaasoq, aamma maajip avataatigut, studieadjunkti oqarpoq.
- Aasaanerani meeqqat aneernerusut takusarpagut, soorlu arsaattarfinni. Silap qaamanerulernera tamassumunnga pissutaavoq. Sumiiffik qaamaneruppat meeqqat toqqissisimanerusarput, aammali pilersaarusiugaanngitsumik aalanissamut periarfissaqartillugu peqataarusunnerusarlutik. Silami periarfissaqartitsinerunissaq, ukiuunerani qaammaqquteqartitsinerunissaq periarfissatut takusinnaavakka. Sammisaqartitsinermi aamma inersimasut nakkutiginnissinnaanerat periarfissaavoq, oqarpoq.
Timi aalatiutigalugu ilinniartitsineq soqutigineqartoq
Atuarfiup pisariaqartitai aallaavigalugit ilinniartitsisunik pikkorissaasinnaaneq Ilinniarfissuup neqeroorutigisarpaa. Timi aalatiutigalugu ilinniartitsineq ilinniartitsisunit soqutigineqarluartarpoq.
- Atuarfiit amerliartorput timip aalatinnera atorlugu ilinniartitsinermik ingerlatsisalersut. Ileqqorisat allanngortinnissaat tassani aamma apeqqutaaqataavoq, ilinniartitsisullu ilinniartitseriaatsimik pilersaarusiornissamik nutaamik eqqarsarnissaq aamma sungiusartariaqartarpaat. Ilinniartitsisullu aamma ilinniartarpaat meeqqat atuartitsiviup avataani aamma ilikkarsinnaasarnerat, oqarpoq.
Taassuma erseqqissarpaa ilinniartitseriaatsimi, timersornermilu ileqqut allanngortinniarneri ilaatigut piffissaleruminaassinnaasartut. Oqartussalli periarfissaqartitsinerunissamut arlalinnik periarfissaqartut taassuma oqaatigaa.