Immikkut ilisimasalik: Issittumi "sorsunnersuaq nillertoq" nutaaq eqqartorunnaarniarsiuk

Issittumi sakkussiorneq pillugu russit amaruat aggilernerarlugu nillianersi mianersuutilaarsiuk. Allaaserisami, nittartakkami atuagassiammi The Conversation-imi post. doc. Danita Catherine Burkemit, Syddansk Universitetimi Center of War Studiesimik suliaqartumit allanneqarsimasumi oqariartuutit pingaarnersaraat.

Issittumimi sakkussiortoqaraluartoq, nunat pissaanilissuit akornanni nutaamik sorsunnersuarmik nillertumik aallartitoqalernera oqaluttuaavoq ulorianartoq.

- Naalagaaffiit issittumiittut nunaatitik silaannakkut, immap naqqatigut imaatigullu illersugaraat, taamaattuaannarnikuuppullu, allaaserisamini allappoq.

- Sakkutooqarnermi taamaaliorneq pissanganarnerulersitsisariaqanngilaq, attaveqaqatigiiffiit nutarterneqaraluarpataluunniit, ilaatigullu allilerneqaraluarpataluunniit.

Sakkutooqarneq sorsunnermuinnaq tunnganngilaq

Taassuma erseqqissarpaa sakkutooqarnermi suliat aamma allarpassuusinnaasut, sinerissamilu nakkutilliisut sakkutuujusinnaaneri, soorlu Danmarkimisut, imaluunniit inuinnarnit nakkutilliisoqarnerusinnaanersoq, soorlu Canadamisut, assigiinngisitaarsinnaasarpoq.

- Nunap sakkutuui assigiinngitsunik suliassaqartarput – sorsunnermi suliassamik saniatigut. Nunami ajunaarnersuaqartoqartillugu ikiuutilertorsinnaasarput sillimaniarnermilu assigiinngitsunik suliassaqartarlutik, tamakkulu sorsunnermut attuumasuusariaqanngillaq. Ujaasinerni peqataasarput, politiinillu ikiuuttarlutik, Danita Catherine Burke ilaatigut allappoq.

Aningaasaqarnikkut pingaaruteqarnermi sillimaniarnermik annertusaasoqartarpoq

Ruslandip issittumi nunaatimini sakkutooqarfimminik ammaaqqinnera sakkussiorneralu taassuma nassuerutigilluinnarpaa. Soorlu ippassaq allaaserisatsinni, Nagurskoyemi sakkutooqarfimmi timmisartunik maleersuutinik, Kalaallit Nunaata sineriaanut apuussinnaasunik inissititerivoq. Tamannali tupinnarpallaanngilaq, Issittormi aningaasaqarnikkut pingaaruteqarneruleriartortutut isikkoqarpoq, Danita Catherine Burke isumaqarpoq.

- Issittup aningaasaqarnikkut periarfissagissaariartornerani attaveqaqatigiinnikkut sakkutooqarneq eqqumaffigineqartariaqarpoq. Pingaartumik Ruslandip erseqqissarsimavaa aningaasaqarnikkut pingaaruteqaleriartornermi sakkutooqarnerup annertusarnissaa aalajangiisuulluinnartoq.

- Ruslandip issittumi pisuussutai aningaasaqarnikkut sillimaniarnermut qitiulluinnarput, taakkulu naalakkersuisuisa periusaat imaappoq: 'Nunap Issittumi sillimaniarneranut pingaaruteqarpoq sumiiffimmi imaani sakkutuut, silaannakkut sakkutuujusartut nunamilu sakkutuut inissisimanissaaq. Nunalli sillimaniarneranut tunngasoq sorsunnermut illersornissamullu tunngaannanngilaq, allappoq.

Oqallinneq sakkutooqarnikkut pissanganerulersitsisinnaavoq

- Eqqaamasariaqarpoq sakkutooqarneq sorsunnermi atorneqartarmat, sorsunnerinnarmili atorneqartariaqanngimmat.

Sillimaniarnermut annertunerusumut apeqqutip, “sorsunnersuarmik nillertumik” nutaamik oqallinnermi, Danita Catherine Burke puigorneqalersoraa. Oqallinnerlu pinngitsoortitsisinnaanissamik pinngitsuuisinnaavoq: tassa sumiiffimmi pissanganartorsiortoqarnerulersinnaavoq.