Immikkut ilisimasalik: Isertuussat saqqummiunneqarput
Nersunarpoq Naalakkersuisut mittarfiliornerit aningaasaqarnerannik, allatullu aaqqiissutaasinnaasunik qulaajaanialermata, aningaasaqarnermut professori oqarpoq.
Tallimanngormat Naalakkersuisut mittarfiliortiternerit aningaasaqarnerannut nassuiaat tamanut saqqummiuppaat – pingaartumik Ilulissani Nuummilu mittarfittaassanut – naliliisoqarporlu taakkua missingersuutigineqartumit 400 millioner aamma 500 millioner koruuninik akisunerussasut. Tassa akitsoriaataat katillugit 900 millioner kruunit, aviisi Sermitsiaq allappoq.
- Ilulissani mittarfimmut sanaartornermi aningaasartuutit tamarmiusut 1.362 millioner koruuniussasut nalilerneqarsimavoq. Tassani sanaartornermi aningaasartuutissat 363,9 millioner koruunit kiisalu mittarfiup aallartisarnerani ingerlatsinermi aningaasartuutissat 71,3 millioner koruunit eqqarsaatigineqarsimanngillat. Mittarfiliornermi aningaasartuutissat tamaasa ilanngullugit nutaamik naatsorsuinermi aningaasartuutissat tamarmiusut 1.795,9 millioner koruuniupput. Nuummi mittarfimmut sanaartornermi aningaasartuutit tamarmiusut 1.678,7 millioner koruuniussasut nalilerneqarsimavoq. Tassani sanaartornermi aningaasartuutissat 364,3 millioner koruunit kiisalu mittarfiup aallartisarnerani ingerlatsinermi aningaasartuutissat 71,2 millioner koruunit eqqarsaatigineqarsimanngillat. Mittarfiliornermi aningaasartuutissat tamaasa ilanngullugit nutaamik naatsorsuinermi aningaaartuutissat tamarmiusut 2.113,1 millioner koruuniupput, nassuiaammi allassimavoq.
Akitsoriaatit erloqinartut
Nutaajunngilaq mittarfiit naatsorsuutigisamit akisunerussammata. Tamanna qinersineq sioqqulluguli saqqummiunneqareersimavoq, nutaajuvorli Naalakkersuisut atorfilittallu maanna piviusut ammasumik saqqummiummatigit, taamaasilluni akitsoriaatinut pissutaasut tamarmik takusinnaalerlugit.
– Tamanna erseqqissisitsivoq, tamannalu nersunarpoq. Iluaqutaanngilaq pissutsit isertuunnissaat, taamaappammi inuit suliniummut tamarmut iluamik pasitsaassaqalissapput. Naalakkersuisutut nutaatut atorfissaqartinneqarpoq isertuussat tamaasa saqqummiunnissaat, taavalu qimerlooriarlugit nutaamik aallartilluni, Aalborg Universitetimi aningaasanik aqutsinermi professori Per Nikolaj Bukh Sermitsiamut oqarpoq, taassumalu siusinnerusukkut akitsoriaatit isornartutut oqaatigisimavai.
Allaaserisaq tamaat uani Sermitsiami atuaruk: