Immikkut ilisimasalik mianersoqqusivoq: Tuluit oqaasiisa oqaatsit allat ingiassavai
Inuarullikkamik nunaqqateqarneq inorujussuarmik nunaqqateqarnermit pitsaaneruvoq. Taamaattumik kalaallit oqaasii qallunaatuumik ilaqarlutik aarlerinannginnerupput. - Tuluit oqaasii eqqutivinneqassappata tamanna annertuumik aalassatsitsissaaq immikkut ilisimasalik isumaqarpoq.
Nunap inoqqaavisa oqaasii atugaajunnaaraangamik ingammik tuluit oqaasiinit nungutinneqartarput. Nunarsuarmiut oqaasii nunap inoqqaavisa oqaasiinik inuulluuteqarput, ingammik Amerikami avannarlermi, aammali Australiami, Manerassuup qeqertaanni, Afrikami nunanilu allani.
Aviisi AG taama allappoq.
Tamanna Kalaallit Nunaanni atugaalersinnaavoq sissuinngikkaanni, oqaatsitigut ilisimatooq siuttoq Per Langgård isumaqarpoq.
- Tuluit oqaasii tamakkiisumik ammaanniaraanni ajornartorsiut uaneralaamiissaaq. Nunat tamat akornanni misilittakkat takutippaat oqaatsit ikittuinnarnit atorneqartut tuluit oqaasiinik sanileqarunik piffissap ingerlanerani nunguinnartartut, oqarpoq.
Per Langgård naapertorlugu qallunaat oqaasii taamatulli allanik taarsiisartuunngillat, nunat tamat akornanni siaruangaarsimannginnerat peqqutigiinnarlugu.
Inuarulligaq inorujussuarmut
Qallunaat oqaasii inuarulligaappata tuluit oqaasii nakuarsuupput, taamaallaat nunarsuarmi tamarmi milliuunilikkaarsuarnit atorneqarnerat piinnarnagu, Per Langgårdimi naapertorlugu qarasaasiakkut atugaanerujussuat peqqutigalugu.
- Ikerup illuatungaani ilaatigut Nunavummi Alaskallu avannaani Inuppiani assersuutissaqarpoq qanoq pisoqartarnersoq tuluit oqaasii namminiiginnartinneqaraangata, oqarpoq.
Taava qanoq pisoqarta?
- Nunap inoqqaavisa oqaasii inuiaqatigiinni tammarsimapput. Qanigisat akornanni oqaatsit kiserngorussimapput, kaffellertuni oqaatsinik taaneqartartut, pisortatigoortumilli oqalunneq, tassalu ilinniartitaaneq, naalakkersuinermik sulineq, imali ulluinnarni niuertarfimmi pisiniarneq tuluit oqaasii atorlugit ingerlanneqartarpoq, Per Langgård akivoq.
Allaaserisaq tamakkiisoq oqaatsinillu immikkut ilisimasallip oqaatsit pillugit unammillernartui pillugit naliliinera atuarlugu aviisimi AG-mi. Uani ataani pissarsiarisinnaavat: