Immikkut hiistertitsisarneq iluatsilluartoq: Meeqqanut iluaqutaaqaaq

Suliniut aallarnisaasut pingasut aallaqqaammut naatsorsuutigisimasaanniit arlalissuartigut akisunerullunilu sakkortunerusimavoq. Pissarsiaalli akilersinnaavoq, piginneqataasoq Marie Louise Frederiksen oqarpoq

Pia Marie Larsenip, Helene Møller Danielsenip aamma Marie Louise Frederiksenip akunnerminni hiistinut akisussaaffik avissimavaat, taamaalillutik paarlakaajaallutik hiistit inaat isumagisarlugu hiistillu aneerlutillu isernissaat nerinissaallu isumagalugu. Agguaqatigiissillugu tamakkiisumik ataatsimik sulisoqarput hiistit inaanni suliaqartumik.

Aasaanerani 2020-miilli Nuummi innuttaasut Qinngutsinni Islandimiut hiistii takuniarsinnaallugillu hiisterfigisinnaasimavaat. Taamanikkut hiistit arfineq-pingasut toqqaannartumik Reykjavíkimit Tukuma Arcticamut ilaallutik tikipput. Ullumikkut Viska Horses and Roomsimi silami ungaluliami hiistit arfineq-pingasuupput.

Taama aviisi Sermitsiaq allappoq.

Suliffeqarfiuteqartut tassaapput Pia Marie Larsen, Helene Møller Danielsen aamma Marie Louise Frederiksen, maannamut tamarmik akeqanngitsumik sulisut. Kingulleq taama oqaluttuarpoq, sapaatip-akunnerani kingullermi ernini qulingiluanik qaammatilik kissumiarlugu Sermitsiamut hiistertarfimmik hiistillu inaannik takuniaatitsinermini. Aallarnisaasut pingasut suliniummut namminneq aningaasaatiminnik aningaasaliipput akissarsianillu akiliinissaminnut akissaqannginnamik kajumissutsiminnik sulillutik. Soorunami Marie Louise Frederiksenip neriuutigaa tamanna piffissap ingerlanerani pisinnaalerumaartoq.

Meeqqallu nuannaarutigeqigaat takullugu pingaartupilussuuvoq. Tamannalumi aamma peqqutigalugu ingerlaannarniarpugut, naak aallaqqaammut immaqa naatsorsuutigisatsinniit sakkortunerugaluartoq, Marie Louise Frederiksen oqarpoq.

Allaaserisaq tamaat Sermitsiami sapaatip-akunnerani saqqummersumi atuaruk, uani:

Powered by Labrador CMS