Skip to main content

Immikkut ataatsimeersuarnermit assit takukkit

Siumup immikkut ittumik ataatsimeersuarnerani siulittaasumut qinigassanngortittut aallartitanut 66-inut saqqummiussipput, partiitoqarlu nutaanngorsarpaat

Lars-Emil Johansen siulliulluni oqalugiarpoq.

Oqalugiaataanit tigulaagaq:

– Siulittaasumut qinigassanngortissinnaagama nuannaarutigaara. Siumup anersaava erseqqissarneqaqqissaaq. Ataatsimuussaagut, erseqqissaavoq, politikkinilu tikillugu

– Assigiinngissuteqarneq annikillisarneqassaaq. Ilinniagaqartitsineq qaffassarneqassaaq. Peqqinnissaqarfik pitsanngorsarneqassaaq. Unammillersinnaassuseqassaagut. Siumup suut, qaammatini kingullerni 18-ini angusimasani pitsaasut attatiinnassavai. Akuersaanngilluinnarnerup atorunnaarsinnera attatiinnarneqassaaq. Kalaallit pisariaqanngitsumik artukkerneqassanngillat. Aatsitassaativut naleqanngillat qallunngikkutsigit tuniniarlugillu. Aalisarneq ineriartorteqqinneqassaaq. Assigiissumik akeqartitsineq nalileqqinneqassaaq, Lars-Emiili oqarpoq nangillunilu:

– Siumukkormiuuvunga uummatikkut, seqinnersumi, anorersuartumi, Siumukkormiuuvunga piumasara pinngikkaangakku qimaaginnarneq ajortoq imaluunniit nutaamik partiiliorneq ajortoq, Lars-Emil Johansen aallartitanut oqarpoq.

Tulliulluni oqalugiarpoq Doris Jakobsen. Taanna ilaatigut oqarpoq:

– Sassarpunga pissutigalugu isumaqarama partiip manna tikillugu aqunneqarneranit pitsaanerusumik aqussinnaallugu. Siumut nanortut nukittutigaaq, allaat anorersuartumi, imaasiallaannarlu uppitinneqarsinnaanani.

– Siumutd nukittunerulissappat tunuliaquttat nukittorsarneqassapput. Inuusuttut nukissaapput. Siumut sapinngilaq. Ersissuteqanngilagut, aalajangiinissamut qununngilagut, taanna erseqqissaavoq.

– Siumumi kikkunnut tamanut inissaqassaaq. Kalaallit oqaasii pingaartitaraakka, isumaqarpungalu meeqqat kalaallisut oqalunneq ilinniassagaat. Sulisartut avataanit tikisitat naammaleqaat. Kalaaleq nunaqavissoq sapinngitsoq pisariaqartinneqartutut misigisimassaaq, pisariaqanngitsitatut misigisimasani, Doris Jakobsen oqarpoq.

Nick Nielsen ilaatigut oqarpoq siulittaasunngornissaminik takorluugaqarsimanani. Taamaattumik ulloq namminerminut angisuujuvoq.

Doris Jakobsen tamatigut ikiuutarsimanera pillugu qutsavigaa. Taassumalumi Siumukkunnut peqqaarmat ikiortarsimavaa.

Aamma Kim Kielsen Lars-Emil Johansenilu iliuuseqarsimanerannik qutsavigai.

– Lars-Emiilip sorpassuarnik ilinniartissimavaanga tapersersortarlungalu. Assigiissuteqarpugut ataatsimeeruterpassuaqarpugullu, dtaanna oqarpoq.

– Siumup Lars-Emil Johansen qutsavissaqarfigisorujussuuvaa.

Nick Nielsen tiguartissimarpasittorujussuulluni avatinilu atorlugit oqalugiarpoq.

Erseqqissaavoq ilaasortanik atorfissaqartitsilluni, erseqqissaavorlu qinersiartuinnaanngitsut, taasisussalli atorfissaqartillugit.

– Pingaarnersaavoq suliffissaaleqinerup akiorneqarnissaa. Tamanna suleqatigiinnikkut pissaaq. Nammatassaq tamanna Siumup kisimiilluni saperpaa, taanna oqarpoq.

Ilanngulluguli aamma nassuerutigaa ataatsimeersuarnermi siulittaasumut qinigassanngortissimanaviarani Aleqa Hammondip Naalakkersuisunut ilaasortanngortissimanngikkaluarpani.

Aleqa Hammondimut oqarpoq taanna pikkorissuusoq suleqatigineratalu nanginnissaa qilanaaralugu.

Nick Nielsenili Aleqa Hammondimit assamminneqanngilarluunniit.

Kim Kielsen ilaatigut oqarpoq:

– Takorloorsimanngikkaluarpara Lars-Emil Johansenimut unammillissallunga. Pingaarnersaavoq innuttaasut sullinnissaat. Partiimut allamut nuunnavianngilanga, Siumullu ilisarnaataa ilivinni naajartuinnassanngilaq. Nunami maani suleqatigiileqqittariaqarpugut. Aningaasarsiorfissat ataatsimoorluta ujartussavagut, innuttaasut aningaasaataannik arsaartussanngilagut. Aalisarneq pitsanngorsarneqassaaq. Assersuutigalugu saarulliit 40 procentiinnaat pisarisarpavut, Kim Kielsen tungujortumik annoraalersimasoq oqarpoq.

Kommunersuit nalilersoqqinneqassapput. Siumut akisussaassuseqassaaq kukkunerillu iluarsillugit. Attaveqarnermi annertuunik aalajangigassaqarpoq, Siumullu akisussaaffik tamanna qimarratiginianngilaa, taanna oqarpoq.

Angerlarsimaffeqanngitsullu pillugit oqarpoq:

– Kalaaleqativut sumunngarfissaqanngillat, sumi tamaani siniffissarsiortarput. Taamaattoqarsinnaanngilaq. Naak nammaqatigiinneq?

– Inuit qinigaattut sulissaasut aqqutissiuussissaagullu.

Ilaatigut norskit naalakkersuisui eqqaavai. Ukiut sisamat pinngitsaalisamik naalakkersuisoqartartoq, maanaannaq qinersisoqartarani. Naalakkersuisut uppititaassanatik suullu tamarmik unittuussanatik, Kim Kielsen oqarpoq.

Tamatuma kingorna qinersisoqalerpoq.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER