Immaqa pitsaanerpaamik isumaqanngikkaluarluni: »Danmarkimit qoqassineqarsimavugut«
Ullut qangarnitsat pillugit oqartoqarsimavoq, ajorunnaarsinneqarsinnaanngitsut. Taamaakkaluartoq oqaluttuarisaanerup annertuumik qulaajaavigineqarnissaa pisariaqartoq, qinikkat isumaqarput. Siornatigullu politikkikkut malunnaateqarluarsimasup ullutsinni unammilligassat isiginiarneqarnissaat kaammattuutigaa.
Múte B. Egede nunasiataasimanerup sakkortuumik oqallisigineqaqqilernera tunuliaqutaralugu naalagaaffeqatigiit siuttuisa ataatsimeeqatigiinnerannut aallarpoq. Nunasiaataajunnaarnerup kingorna kanngunartuliaasimasut ilaat, tassalu spiralilersuisimanermik kanngunartuliaq artornartoq, ministeriunermut Mette Frederiksenimut oqaloqatiginnissutiginiarini, ilimasaarutigereersimavaa, aviisi AG allappoq.
Tamatuma saniatigut nunasiaataanerup nalaata itinerusumik qulaajaavigineqarnissaa Mútemit Inatsisartunullu ilaasortanit amerlanerussuteqartunit sakkortuumik kissaatigineqarpoq. Arlaannaannulluunniit attuumassuteqanngitsumik qulaajaasoqassasoq – 60-ikkunni 70-ikkunni naartunaveersaartitseriaatsiniinnaanngitsoq – aammali qangaanerusoq iliuuseqarnerlunnerusinnaasunik allanik.
Siumumeersoq Doris J. Jakobsen nunasiaataasimanerup nalaa pillugu oqallinnermi sakkortunerpaamik aallartippoq.
- Siusinnerusukkut uukapaatinneqarsimanngikkaluarutta immaqa ullumikkut naalagaffinngoreersimassagaluarpugut namminersortut, erseqqissaavoq.
Inatsisartuni sapaatip-akunnerini kingullerni partiit assigiinngissutaat akimorlugit aalajangersimasumik isumaqartoqalersimagunarpoq, Kalaallit Nunaat tunoqqutaarinikkut Naalagaaffeqatigiinnermut isertinneqarsimasoq, immaqa innuttaasut kissaatiginngilluinnaraluaraat.
- Innuttaasut apereqqaarnagit pinngitsaalilluata Danmarkimi inatsisit tunngaviusut ataanniisilersimavaatigut, Doris J. Jensen erseqqissaavoq.
Namminiilivinnissaq
Inatsisartuni nalinginnaasumik taamaallaat siullermeerinninnerni politikerit suliat pillugit isummaminnik kamaammiussimallugu paarlaasseqatigiittaraluarput. Kisianni »nunatta nunasiatut inissisimajunnaarfiani pisut qulaajarneqassasut« pillugit siunnersuutip aappassaaneerneqarnerani oqaaseqartut pissatsisimaarluinnarput. Kalaallit Nunaat 1953-imi Danmarkimi amtinngormat Danmark FN-imi nunasiaatajunnaarsitsinissamik piumasaqaammik naammassinnissimanersoq pillugu suli oqaatigiumasarpassuaqarput.
Sukumiilluinnartumik misissuisoqarnissaa, allagaatillu tamarmik misissorneqarnissaat, isumaqatigiissutigineqarpoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: