Immap naqqatigut kabelip kittorarnera Nanoq Mediamut annernangaatsiarpoq

Tele-Postip immap naqqatigut kabeliutaata Nuummiit 625 kilomiiterisut ungasitsigisumiittup kittorarnerata kingunerisaanik, Nanoq Mediap januaarimi kaaviiaartitsinissaagaluaq annaaratarsinnaavaa.

Immap naqqatigut kabeli, Tele-Postip pigisaa, imaani 3 kilomiiterisut ititigisumiittoq decembarip 27-ani kittorarpoq, tamannalu inuussutissarsiortumut atuisumut Nuummi internetimik atuisut akornanni unammillertumut ajoquserneq ilungersunarluinnarpoq.

Aviisi AG taama allappoq.

Nanoq Media Islandimut immap naqqatigut kabeli atorlugu isumaqatigiissuteqarnerminut illoqarfiit pingaarnersaanni atuisunut internetimik pilersuisuuvoq, taamaammat Tele-Postip Canadamut allakkoortitsilluni attaveqaatiliornera Nanoq Mediamut iluaqutaanavianngilaq.

Atuisunik annaasaqarneq

- Internetimut aqqutip kipitinneqarneri tamaasa atuisunik annaasaqartarpugut, atuisullu ikiliartorput atuisutsinnut attaveqaammik aalajaatsumik pilersuisinnaannginnatta, aningaasaqarnermi allaffeqarfimmilu pisortaq, Preben B. Ingemann oqarpoq, oqaatigaalu Nanoq Mediami atuisut amerlanerpaajummata 216-iusimasut.

Atuisut maanna 176-iupput, Nanoq Mediallu naatsorsuutigaa atuisut amerlanerit atuisuujunnaassasut.

Pissutaasoq ilisimaneqanngilaq

Tele-Post kabelinut umiarsuarmik angisuumik ajoqusersimasumik suliaqarsinnaasumik suli isumaqatigiissusiorsinnaasimanngilaq. Kabelip kittorarneranut peqqutaasoq suunersoq suli paasineqanngilaq.

Immap naqqatigut kabelip iluarsiniarnissaanut suliniut aviisimi AG-mi atuarsinnaavat – aviisi uani ataani pissarsiarisinnaavat:

Powered by Labrador CMS