Skip to main content

Immap naqqatigut kabelip kinguartinneqarnera isornartorsiorneqartoq

Immap naqqatigut kabelip Avannaanut tallineqarnissaa kinguartinneqarnera Siumumit iluarineqanngilaq. Innuttaasut arlallit kinguartitsisoqarnerani eqqorneqassapput, partii isumaqarpoq

Sapaatip-akunnerata siuliani Sermitsiaq.AG-p allaasereriigaatut, immap naqqatigut kabeli Avannaanut tallineqarnissaa kinguartillugu Tele-Post aalajangerpoq.

Tamanna siulersut 2016-ip aallartinnerani oqallisigissavaat, taamatulli kinguartitsisoqarnerata kinguneranik immap naqqatigut kabelip pilersinneqarnissaa ukioq ataatsimik kinguartinneqartariaqarpoq.

Taamatut aalajangerneq Siumup Inatsisartuni ilaasortaatitaannit isornartorsiorneqarpoq.

Innuttaasut akiliipput
Tassami partii naapertorlugu internetsi inuiaqatigiinnut pingaaruteqaleraluttuinnarpoq innuttaasunut kiffartuussinermi, ilinniartitaanermi, ungasianiik nakorsiarnermi, kisianni aamma sunngiffimmi periarfissat nutaani.

- Qularnanngilaq innuttaasorpassuit Maniitsumiit avannamut internetsip periarfissariitai atorluarnernissaat qilanaarigamikkit, Siumumi politikkikkut oqaaseqartartoq Jens-Erik Kirkegaard tusagassiorfinnut nalunaarummi allappoq.

Atuaruk: Diskomut immap naqqatigut kabeleqalissanngikkallarpoq

Kisianni maannakkut immap naqqatigut kabelip avannaanut siaarnissaa, Upernavimmullu sakkortuusaaviit ilanissaat piffissaligaanngitsumik unitsinneqarput.

Apeqqusiisut
Kalaallit Nunaanni innuttaasut assigiimmik akiliisassannginnerat aamma partiip isornartorsiorpaa.

Immitsinnut aperisariaqannginnerluta namminersortunngorsaaneq piviusorsiornersoq nunami Kalaallit Nunaattut ittumi? Immitsinnut uupakaatiinnanngilaguut isumaqarutta unammillernermi niuffaffimmi naammattumik peqartoq, inuit 56.000-iinnaat akornanni, pisisartullu suli ikinnerit, ima an-nertugisumi  siaruarsimasut Norgep kujataaniit Afrikap avannaanut?, Jens-Erik Kirkegaard aperivoq.

Naalakkersuisunut kaammattuut
- Immaqa nunani Kalaallit Nunaattut ittuni suna tamarmi namminersortunngorsarneqarsinnaanngilaq, kisianni susassaqarfiit ilaat allatut ajornartumik kisermaassilluni ingerlasariaqartut suna tamarmi nammaqatigiissappat.

- Kisianni imatut paasineqassanngilaq susassaqarfik kisermaassiffiusoq eqqissisimaaginnarsinnaasoq. Kisermaassilluni susassaqarfeqarneq piumasaqaatinik annertuunik pisussaaffiliivoq. Tamanna Tele-Postip ilisimajuartariaqarpaa, Siumup Inatsisartunut ilaasortaatitaat taama oqariartuuteqarput.

Siumup Naalakkersuisut piaartumik susassaqarfik inerniniliiffigeqqullugu kaammattorpaat.

Atuaruk: Tele-Post: Qasigiannguanut imaatigut kabeli

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER