Immap naqqatigut kabelip ilungersortitsinera Tele-Postip naammassilerpaa
Immap naqqatigut kabelip Kujataaniittup kittorarfiata aaqqissuunneqarnera sapaatit akunneri arlalialunnguit qaangiuppata nangeqqinneqassasoq, Tele-Post ilisimatitsivoq.
Kujataani immap naqqatigut kabeli kittorarmat upernaaq iluarsaanneqariaraluarpoq iluatsinngitsumilli. Silap unerisimannginnera sikorsuillu pissutaallutik canadamiut umiarsuaat immap naqqatigut kabelinik iluarsaassisartoq sumiiffimmi iluarsaassisinnaasimanngilaq. Immap naqqatigulli kabelit kipiffii marluk allat, Sisimiut kujataaniittoq avannaaniittorlu iluarsineqarsinnaasimapput.
Aggustip sisamaani aallarteqqissapput
Telemi pisortaaneq Kristian Reinert Davidsen Sermitsiaq.AG-mut ilisimatitsivoq umiarsuaq immap naqqatigut kabelinik iluarsaasartoq Halifax juulip 30-ani avalassasoq, iluarsaassisinerlu pilersaarutit malillugit aggustip sisamaani aallartissalluni.
- Pilersaarutip piffissalersorneqarnera suli naammassivinngilarput, Kujataanili atuisugut piffissaq sioqqullugu ilisimatissavagut. Iluarsaassinermi aallartippat upernaaq manna iluarsaasseriarnertut attaviit eqqorneqarujussuaqqissapput. Ajuusaarutigaa atuigusut eqqorneqartariaqarmata, allatulli iliorsinnaanngilagut, telemi pisortaaneq oqarpoq.
Atuisut Paamiuniit Kujataa tamaat ilanngullugu iluarsaassinermit eqqorneqassapput. Nammineq angerlarsimaffimmi atuisut eqqorneqarnerpaassapput, inuussutissarsiornermilli ingerlataqartut, aamma Peqqinnissaqarfik Politeeqarfiillu internetimut attaveqarneri pitsaanerussallutik.
Suliassat marluk
Immap naqqatigut kabelip kippaata illua upernaaq manna iluarsineqarpoq. Kippaatali aappaa suli iluarsineqanngilaq, kippakullu suli atatilerneqaratik. Taakkuuppullu maanna suliarineqartussat.
- Neriuppugut aggustip 15-ani naammassisinnaassalluta. Taassuma kingorna Qaqortup tungaanut attaviliisoq suliarilissavarput, Kristian Reinert Davidsen ilisimatitsivoq. Illoqarfiup tungaanut attaviliisoq iluarsaallugu aggustip 28-ani naammassineqarnissaa, taassuma neriuutigaa.
Umiarsuaq immap naqqatigut kabelinik iluarsaassisartoq imaani aalavallaartumiittussanngilaq, iluarsaassineq iluatsissinnaajunnaartarmat. Umiarsuup qanoq orfaatiginissaanut killiliussaqarpoq, tassami immap naqqanut 3 kilumiiterisut ititigisumiittut iluarsaanneqartartussaammata.
Soorlu sinnattupiluk
Tele-Postimut 2019 sinnattupiluttut iinnarpoq. Immammi naqqatigut kabelit arlalitsigut iluarsartungassanngorsimapput. Taama pisoqartaarnerata takutippaa nunap iluani attaveqaqatigiinneq qanoq aarlerinartorsiorsinnaatigisoq, qitiusumik attaveqaatit ajutoorpata. Aqutsisut nassuerutigereerpaat immap naqqatigut kabelit kipisarneri 2019-imut naatsorsuutini takuneqarsinnaassasut, tassami milliuunilikkaanik akiliisoqartariaqarmat. Assersuutigalugu Canadamiut umiarsuaat immap naqqatigut kabelinik kippakunik iluarsaassisartup atorneqarnera ullormut milliuunit affaanik akeqarpoq.